金融High Tea 2013年11月18日
大變局 執過位
2013年11月18日
港股上周五大升383點，升到23032點，上周五夜期再升278點，收23281點。上周初個市借住所謂「三中全會沒料到」調整，但轉眼彈番600點以上，加埋夜期升幅已從低位彈番900點。正如我所講，呢個市係上落市，三中全會亦唔係講到咁差，詳細嘢又未公佈，唔應該睇得太淡，若當時低吸，呢兩日再抽一抽沽之，應可食到一小浸。
呢兩日可以再帶動港股的有美股走勢，美股上周五又再升，杜指升85點到15961點，16000點大關彈指可破。睇番轉頭有啲唏噓，美股杜指在海嘯前14000點，如今破晒當日高位，升到差唔多16000點，話美國大放水尚未救起經濟，但起碼救起了股市。香港2007年時借港股直通車的流料炒到上32000點，家頭兩個數字倒轉了，變咗23000點，從高點跌咗近30%。呢幾年香港股市係上落市，中國股市仲係下跌市，上證綜指2007年高位係6000點，家得番2135點，比高位唔見咗近65%！美國救起自己，浸死其他人，如果我哋唔按上落市的觀念來買股票，真係好難有肉食。
講起上落市，諗起匯控(005) ，佢就係由上升股變上落股，更諗起一件舊事。話說2008年金融海嘯，2009年年頭個市插到落底，我手上揸住價值三幾十萬的陳年匯控股票，呢啲股票真係細細個就買落，本來無理佢。但到海嘯高潮時，匯控跌到30幾元，仲宣佈要按12股供5股的比例，以28元供股。嗰時真係火都嚟埋，心諗匯控之禍，在於投資美國，當年唔知係怕香港唔穩陣，遷冊兼大舉投資美國，定係匯控大班真係覺得可以砌低美國佬，做環球銀行，結果投資美國搞出大頭佛，出現危機斬纜又斬得慢，搞到要低價供股；由於發股比例大，攤薄效應高，就算災後匯控賺番本來咁多錢，股數大增每股盈利都調低好多。
管理唔好 長揸無景
當時真係愈諗愈覺得呢班大班管理差，就有一個諗法，供埋股等佢升番少少時，沽晒佢，去內地買層樓，睇吓5、6年後兩個投資方法邊個跑出。結果等匯控彈番上55元左右，一筆沽清，去廣州天河區買咗間十年樓齡的屋村樓，1000呎多一點，樓價110萬人仔，放40萬借埋70%按揭，收6000元月租，一個月貼5000元左右供樓。呢間廣州樓咁買法，係專門同揸匯控比賽。
四年多過去，匯控如今85.6元，比我沽的時候，升咗85%，表面睇沽咗好老襯，但匯控在災後反彈一年後，自2010年起就在60元至90元呢個大區域上落，今年更在80至90元中間窄幅橫行。但內地樓市就向上行，當日110萬的廣州樓，現在有經紀打來話有客想出360萬買，我都心郁郁想賣，沽咗佢還埋錢畀銀行，套現300萬人仔，仲有仲有，人仔四年來升值了12%，加埋呢筆，有336萬港元。
大市上落 被迫游水
買內地樓四年幾40萬變336萬，匯控揸到今天得74萬，加埋收息都係80萬多啲，相差何其遠？
講起呢個故事，係想講兩件事，一間大公司「揸飛人」在重大問題上決策錯誤，成間公司會衰好耐，甚至玩完，諾基亞五年前高峰時市值2600億美元，近日以47億美元賣掉，幾年間公司得番個零頭，咁睇匯控都唔算好差啦，起碼翻到身唔死得，所以買公司其實主要買管理層。第二在上升市和上落市不同，在上升市死坐就得，在上落市唔走吓，回報好低，好似今年揸匯控，真係得個揸字，買好多其他大股都係同樣處境。
另外三中全會都可以講講，開完會當日只公佈了一個簡單公告，具體內容欠奉，市場反應較差，認為無料到。到上周五再公佈一個幾千字的「三中決定」，講番好多具體內容出來，顯示會議的決定好重要，未來對各行業都有影響。
水電煤氣 皆受其惠
第一是政府減少對市場的干預。「三中決定」提到推進水、石油、天然氣、電力、交通、電訊等價格領域改革，開放競爭性價格。換言之對現時壟斷性收高價的行業不利，如電訊業、銀行業；但對政府控制價格上升的行業有利，好像能源相關行業，過去能源價格上升，但政府大力控制能源產品的售價，如電價、成品油價、天氣然價等，它們加價都不能加得太多，在能源價格急升時，這些公司都會受損。未來價格逐步放開，這些行業前景會更好。
以三大油企中海油(883) 、中石油(857) 和中石化(386) 為例，上周五中海油升2%，中石油升2.8%，中石化升3.2%，其實升幅不同好合理，中海油主要做上游開採，政府長線開放零售成品油的價格管制，是下游的事情，與佢無關，所以升少啲；中石化主要做下游，開放價格受惠最大，所以升得最多；而中石油上下遊業務平衡，部份生意受惠，就有中等的升幅。另外電股、燃氣股都可以睇好。
第二是開放民營做銀行。「三中決定」講到擴大金融業對內對外開放，包括允許具備條件的民間資本設立中小型銀行等金融機構，進一步打破壟斷。同時加快匯率及利率市場化，建立存款保險制度等。若講收取壟斷收益，內銀比電訊更厲害，內銀貸款收高息，可說一個銀行業榮景，壓抑百業，怨聲很多。所以阿爺想利率市場化，拉低內銀的貸款利率，肯定是長遠目標，問題是中小型民營銀行要搞得成氣候，要花很長時間；我覺得真有機會快速興起的，反而是阿里巴巴和騰訊(700) 可能搞的互聯網金融。不過無論如何，這些並非內銀股的「明顯而即時危險」，所以它們是短線好肥，長線有險，中短期比較大機會是炒上落。
房地產股 並無打擊
第四是房地產着墨好少。如果說開放銀行業的方案並不具體，房地產更接近無講，「三中決定」只提到要加快房地產稅立法，並適時推進改革，無講要壓抑樓價，亦無講要減少對房地產業的調控。這種缺乏落墨的現象，可以理解為樓市成為阿爺的軟功，要大力壓抑，怕經濟回落，要放又怕房價失控。睇嚟中央態度都係如早前傳聞那樣，長線政府不應干預商品房價錢，而是要大力增加保障房(類似香港的公屋)，以保障低下階層的生計。為何「三中決定」沒有把這個意圖講明，恐怕是如照上述表述，民眾見政府話唔干預，必定加入去搶樓，令樓價急升，唯有選擇講少兩句。
第四是國企要將30%利潤上繳。「三中決定」表明提高國有資本收益上繳公共財政比例，至2020年提高到30%，更多用於保障和改善民生(目前由5%至20%不等)。事前市場擔心上市的國企公司要撥30%盈利上繳，但從「三中決定」看，要上繳利潤的是上市國企的母公司，不是上市公司。而且即使按過去要求繳交5%至20%，實際上國企交出來的數字遠少於此數，所以不用太擔心此新要求對上市國企有大影響。
總括而言，「三中決定」透視出來的受惠行業，短期會炒一炒，但它們真正受惠，可能也要等一兩年才見到，所以順勢炒這些股，若炒一兩個月到明年初股價升得好急，可能要先食胡。同樣地，對內銀、內房的短期沒有太壞影響，但長遠看內銀這些壟斷性行業不能太看好，這是一個大變局，五年十年後市場會按今天「三中決定」大執位，長線投資，就要按政策鼓勵的方向去投了。
陸羽仁
金融High Tea 舊文