金融High Tea 2013年11月13日
爭領獎
2013年11月13日
大市勁升一日後出現調整，但市場焦點落係掛牌新股之上，結果兩隻新股都為捧場客帶來進帳，但博雅高開後不斷有沽貨獲利，顯示市場對科網股戒心增加。
兩隻新股中，夾凍資王氣勢掛牌的內地社交網絡遊戲開發商博雅互動國際(434) 收報6.09元，較招股價5.35元，高14%。
不過，睇真啲就唔係咁靚仔，隻股開市報6.97元，已經比暗盤價低，但跟住見到好多沽盤湧出，股價跟住個市向下，幾乎以全日低位收市。
博雅有咁反應，其實唔太令人意外，因為呢類凍資王多數吸引咗唔少抽獎散戶加入，首日掛牌好多人都爭住領獎沽貨。但佢同之前上市的雲遊唔同，雲遊首日見唔少基金吸貨，故此股價頂得好硬，翌日仲可以爆一爆上。博雅似乎就唔係咁夠力。
徽銀表現勝預期
中環茶友話，市場口碑普遍覺得博雅遊戲模式較舊，基本因素似乎雲遊睇高一線，呢個係微觀兩隻股的分別。宏觀嚟講，科網股經過上個月狂爆而上，已經露出疲態，無論係美國抑或香港的科網股，都有呢個現象，備受矚目的twitter掛牌，都難逃升完腳軟的命運，博雅情況更加明顯。由於今次隻股熱購好勁，計及融資成本要7%，股價如果再落，就有可能挑戰大戶的入貨價。
同熱到開巷的博雅比，有萬科、周大福(1929) 撐場的徽商銀行(3698) 係另一番光景。由於已經上市的內銀股賣緊「大包價」，徽商銀行要以招股價下限3.53元定價，集資約85億元，市場反應也算不錯，超額認購約9.8倍。據聞萬科置業(香港)認購了8.84億股；周大福5666萬股，禁售期為6個月。
由於內銀股近期已經跌到好殘，估值好低，加上近期市場興炒科網股，市場對徽商銀行興趣唔會大。
三中落幕炒板塊
不過，世事無絕對，昨日大市走勢疲弱，徽商銀行表現卻好過預期，最低穩守招股價，之後節節向上，最高升超過3.6元，唔使潛水，午後仲有約3%進帳，首日掛牌終於收報3.6元，較招股價3.53元，高2%。新股近期日日開波，今日到佛山金融公司集成金融(3623) 掛牌，據報集成金融在暗盤市場收報2.73元，較招股價2.68元，高1.9%，最高曾造2.73元，低見2.68元。每手2000股，不計手續費賺100元。
新股之外，三中全會今日閉幕，市場關注即將公佈的改革綱領性文件，港股兩萬三及五十天線上(22993) 阻力明顯不輕，令港股昨日勁彈過三百點後重拾跌勢，全日收跌168點，險守22900。
美股杜指再創新高，內地股市昨日上升，惟港股未有跟隨，恒生指數收報22901，跌168點或0.73%；國企指數收報10561，跌21點或0.2%，成交金額494億元。三中全會快有公佈政策方向，是龍是蛇好快有分曉，預料政策不會一刀切最緊要係睇不同板塊。
陸羽仁
金融High Tea 舊文