陸羽仁 BLOG 2013年12月30日
「反直覺」投資
2013/12/30 7:54:13
網誌分類: 經濟
美股Boxing Day大升後靠穩，杜指及標普500指數都係微跌1點，分別收報16478點及1841點。交投則繼續因為好多交易員仍在放假，異常清淡。
變化比較大的是科技股，麥格理發報告指Twitter近期在沒有基本面有任何變化的情況下飆升，股票估值已過高。將投資評級由中性下調至「跑輸大市」(Underperform)，12個月目標價則維持46美元不變。受評級下調影響，Twitter股價上周五急插13%至63.75美元。Facebook股價亦受拖累，下跌4%。納指下跌11點至4157點。
分析師唱淡某隻股票，投資者係唔係要避之則吉呢？CNBC人氣節目《Mad Money》主持人Jim Cramer最近出新書教人買股致富，提到一個「反直覺」(counterintuitive)投資技巧。又幾有趣，幾值得參考喎。
他在他的有聲書《Get Rich Carefully》中話，根據過往的投資經驗，「有些時候，某些股票的最佳買入時機，反而係剛剛俾分析師下調盈利預測的時候。」咦？下調盈利預測，即係話這家公司的利潤預計將不及從前。點解仲要買？
Cramer認為買股能夠成功致富，識得選股係最重要的。佢選股有三個標準，企業要有健康的收資平衡表、良好的管理層，以及行業上的領導者。長期而言，係可以持有的股票。例如Twitter就唔屬於Cramer所指的股票。
佢認為這類基本因素良好的公司一旦成為分析師下調盈利預測的對象，短期而言，對股價當然有向下的壓力，但他相信這些負面影響只係暫時的。長期而言，良好的管理層將會解決問題，並將公司拉回正軌。因此，這些公司的股價因為盈利預期被下調而受挫，反而係趁低吸納的好時機。
Cramer舉了兩個例子。第一個係2009年時3月，全球最大重型建築機械製造商Caterpillar，被市場分析師狙擊，爭相下調其季度盈利預測。令股價連續幾周一路向下。直至某一天，雖然壞消息仍然滿天飛，但股價卻毫無反應。Cramer認為股價在這個時候其實正放出已經到底的訊號，正係入市時刻。Caterpillar當時的股價係27美元，5年後，股價回升到80美元上方。
另一個好相似的例子係摩根大通(JP Morgan)。摩通在2012年因為London Whale事件(一名綽號為「倫敦鯨」的交易員因信用衍生品交易，造成數十億美元虧損。)，大行紛紛下調其盈利預測。第一輪的下調，摩通股價受壓向下，但到第二輪下調，股價已經冇再跌。當時股價跌31美元，一年後已經升番上52美元，反彈超過68%！
Cramer認為這樣的現象會在市場上不斷重演。當市場因個別因素，唱淡某隻股票，而這隻股票又係「基本健全」的(符合前述的三個標準)。中長線而言，往往係賺大錢的最好機會。
陸羽仁
(我不在港，暫停答問，見諒。)
回應(0) 我想回應
陸羽仁 BLOG 舊文