金融High Tea 2013年12月30日
年頭怎落注
2013年12月30日
今年快過去，2014年轉眼就到，在年尾例會講講明年展望，講講目標價，但這些方式年年如是，不一定能為我們帶回特別好的投資建議，首先要知道的是年頭未必係一個入市好時機。
我記起年輕時借稅貸的故事，每到年頭都是交稅的日子，銀行職員會打電話來游說，若上一年年底股市好，特別是新股炒得旺，接着一年銀行職員游說我借稅貸就特別易打動我，即使不是特別有資金需要，也會覺得額外多一筆錢去抽新股，都可以賺回借稅貸的利息有餘，但結果錢是借了，但回報卻不甚佳，以後就不再借這些錢了。
年頭太勇 好易夾死
賽後檢討，點解借稅貸炒股多數唔掂，有兩個原因，第一係上一年年尾新股熱時，特別易令人心雄，但個市熱完會冷，所以在熱鬧時借錢，在大市轉冷時就會輸錢。第二係好多時年頭一開市就升，買慢少少，個市升咗好多，已經去到全年高位或中高位，在年頭入市易摸頂。總結之後，發現年頭若升得太多，係出貨時機，唔係入貨時機，唯一例外係大牛市或大熊市，大牛市如2007年，個市升完再升，一直向上，年頭買都有着數。大熊市如2009年，年頭係咁插，到3月見底，之後大反彈，年頭低位買都可以。在其他年份，特別是在近年好多的上落市年份，年頭太勇，好易夾死。
香港股市無性格，主要跟美國和中國股市，近年美股升、A股跌，香港股市相當呆，向上穿唔到25000點，向下又跌唔穿19000點，一年走5000點上落，若在錯誤時機出入，在大市熱時買、冷時揸，都會幾傷。
明年會點？先睇美國，聯儲局12月開始收水，每月買債量由850億美元減到750億美元，未來有兩種可能結局，第一是美國經濟順勢回升，聯儲局步步收水，至明年年底已結束放水買債計劃，到後年開始加息，這是「順利收水模式」。第二是美國經濟先升後軟，徘徊不前，咁聯儲局可能收一兩期水，將每月買債量合共減少200、300億，但每月仍然買緊500、600億，但已經覺得經濟唔掂，增長回落，失業率掉頭上升，咁聯儲局被迫停止再收水，衰起上來會再加番大放水量，呢種叫做「收唔到水模式」。
新興市場 承壓不低
若然出現順利收水模式，即使美股無事，新興市場都唔會好，因為美國收完水就加息，在收水過程中，市場利息已經升咗上去，美國10年期國債債息家升到2.98厘，若持續收水，好快會上番2008年未放水前的4厘水平。買美國國債都有4厘息收，勢必吸引全球資金回流向美國，特別係新興市場資金好易外流，今年初日本放水，日圓貶值，亞洲各國資金外流，匯價大跌，迫住要大力加息頂住匯價，令經濟壓力大增。若美國收水，日圓又會向下，亞洲新興國家的貨幣危機今年將會重演，股市會好波動。若美國經濟好，美股或者都仲有得升吓，但新興市場股市唔會咁順利。
若然出現收唔到水模式，短期反而更利好股市，因為唔使承受收水的風險，會出現一個延續泡沫的效果，這種境況對新興市場中短線較有利，不用擔心資金外流，亦會延續環球樓市的泡沫，但甚麼東西都有周期，泡沫愈大，維持的時間愈長，爆起上來愈大鑊。不過若單看明年股市，呢種模式對股市較有利，資金繼續氾濫，焗住炒股。
內地水緊 變成常態
要估明年股市係點，美國開邊瓣係最大變數，我唔敢認叻話好易估到，表面看順利收水的機會略高少少，但變數仲有好多，若然美國直線收水，會增加本地股市風險。
另外亦要睇中國。唔知大家有無留意，中國銀根今年多次抽緊，以一周上海銀行同業拆息計，今年6月20日抽上11厘的最高水平，最近再次抽上近9厘的次高水平，然後見高回落。大家要預咗，明年都會咁，一年兩三次，半年結、全年結、農曆年，都係水緊時。今年6月水緊時，市場認為係阿爺有意試吓底綫，以為是一次過現象，我估阿爺試底線只是原因之一，地方政府佔用資金太多、存款銀行不吸引、利率趨向市場化、加上阿爺唔想過度用行政手段控制，造成周期性的緊張，亦係一個側面反映內地銀根本來就唔鬆，若這種假設係啱，內地股市仲未存在大升的條件，小升吓可以，大升一定要銀根好鬆，咁樣才會喪炒股票，銀根不鬆股市升極有限，所以唔好期望有大牛市，有隻小牛都偷笑。
經濟要穩 通脹要低
內地明年有無小牛市，主要視幾個因素，首先是經濟增長趨勢，可否平穩地維持7.5%左右的增長，同時通脹亦處於較穩定的水平，若能如此，股市會較佳。但若首季過後經濟又放慢，都幾頭痛，因為改革本來就有陣痛，例如針對銀行業的壟斷，雖然話銀行太壟斷令借貸利率太高，但在打破壟斷兼利率市場化時，弄不好利率要先上，對經濟有短線壓力。若內地經濟在上半年失速，股市又會插，將拖累香港。我估內地經濟保持較佳勢頭的機會稍高一點，但不能排除出現失速的可能性，萬一這種勢頭出現就要避一避。
本地股份最大隻是地產和銀行股，來年估計都表現一般，若美國真係大幅收水，利息向上，樓市唔會好。利息升銀行息差放闊一點，但按揭生意難做，都唔係咁好。若美國唔係真收水，樓價一升，政府勢必又再打壓，所以樓市難大升，平穩趨跌機會大啲。
炒本地股 酒店當紅
聽完我咁講，你都知我覺得明年炒股仍然不易，唔似係一個大牛市，或者美股仍然係牛市，香港只係上落市。上落市最怕買得貴，年頭1月和3月可能先見一見高位，年中又回。唯一意外是萬一美國收收吓水又話唔收，咁就另作別論。
所以買股票要睇時候，唔好高買低沽，要低買高沽，走到10幾、20%都好叻仔啦，這是炒炒上落市的方法。
當然亦可以炒股唔炒市，不過要揀中當紅行業不易。今年熱股明年可以再熱，若美股唔散，科網股炒多一年唔奇。澳門生意好好，橫琴又風風火火地殺上，澳門續旺，賭股照炒。當然呢啲股都好貴，順勢而炒，要定止蝕，轉勢要走。美國經濟掂唔掂，決定了周期性行業得唔得，若美國真係好，大型航運股會有得炒，但家落注同賭大細差唔多。本地股我就睇好酒店股，因為佢哋真係好好生意也，不過要食大茶飯，可能要等佢哋大插時，好似隻富豪酒店(078) ，家4.81元，已經唔平，但6月大跌市佢見過3.1元，等到佢大插時入，一年食一轉都好和味也。
陸羽仁
金融High Tea 舊文