陸羽仁 BLOG 2014年1月24日
中日夾擊
2014/1/24 上午 08:36:09
網誌分類: 經濟
美股昨日認真醜樣。由開波跌到收場，尾市跌幅略為收窄，杜指收市仍大跌176點至16197點跌幅超過1%；標普500指數跌16點，收報1829點，跌幅0.9%。
美國最昨日經濟數據，唔算太差，雖然Markit公布的美國1月份製造業PMI(採購經理人指數)預覽值53.7點。差過上月及預期的55點。但仍處於擴張區域，而最近一周的首次申請失業金人數較上月增加1000人至32.6萬，好於預期的33萬，12月份的二手房銷售銷售增長1%，年化數字升至498萬幢，創了7年新高，二手房價中值亦攀升9.9%。另外12月份的領先經濟指標指數增長0.1%，係連續第六個月增長。包括麥當勞、星巴克、Netflix及EBay等美企的季度業績亦好過預期。
美股之所以勁跌，主要受中國經濟動力結持續走弱所拖累。正當內地「錢荒」情況嚴重，中央需要泵水入市場渡過農曆新年年關之際，匯豐/Markit昨日聯合公布，1月份匯豐中國制造業采購經理人指數(PMI)預覽值降至49.6，為去年7月以來最低，而且係六個月以來首次失守榮枯線。報告顯示，無論係新訂單、出口、就業等都在收縮。新訂單大幅下降，企業庫存正在提高，意味著中國內部需求正在減弱，整體經濟危危地，有點雪上加霜。
不過，亦有分析仍然樂觀，認為雖然中國經濟增長勢頭放緩，但短期內大幅下降可能性唔大。在出口回暖和內需穩健支撐下，中國經濟料保持平穩運行。
有老外分析員則指出中國經濟放慢，對投資情緒有一定打擊，但又唔係造成昨日美股大跌的主因。他認為日圓兌美元忽然轉強，對美股的打擊仲大。由於日圓近排持續走弱，好多投資者大手參與日圓及美元的利差交易(Carry trade)，即借日圓買美元，而這些美元主要流入了美股市場。
當日圓忽然轉強，由1美元兌105日圓跳升至103日圓，(最新報103.3日圓)。利差交易成本一夜之間貴了好多。這些投資者好多都係對沖基金，佢地一般都用非常好高的摃捍比例去炒。只好拿拿聲沽出美股套現，買番日圓補倉，資金又從美股回流到匯市啦。
另外，美股尤其係科技股，股價近期已經非常高(是定價，唔係估值)，諸如蘋果，股價已經升到548美元、亞瑪遜400美元、LinkedIn 217美元、Visa 228美元、Tesla 179美元，穀歌更係1159美元。要買這些股票，非要大量資金不可，用利差交易套取資金就更顯得重要。當好多人都係咁做嘅時候，日圓兌美元升值與貶值，都會對美股直接造成影響。日圓兌美元升值，美股，尤其係大價股，就成為套現的工具，只有人沽，無人接啦。
再者，美國市場上有好多新興國家的股票掛牌。當地的匯市波動，對這些股票造成打擊，直接影響美國市場情緒。昨日，阿根廷披索(Pesso)因阿根廷違約風險升溫，在美國上市的阿根廷股票勁插8%至10%；美國上市的巴西股票亦因為大量資金逃離巴西，造成巴西雷亞爾(Real)大幅貶值而大跌3%至5%。
陸羽仁
回應(3) 我想回應
陸羽仁 BLOG 舊文