金融High Tea 2014年1月24日
扑殼
2014年01月24日
新股超購王Magnum Group(02080) 首日掛牌，雖然出世遇饑荒，撞正大跌市，表現仍無令小股東失望，高開後全日企硬，收報2.84元，較招股價1.5元，高1.34元或90%，成交5.75億元。全日最高位曾經到過3.21元，最低位為2.72元。投資者一手不計交易費用，帳面賺2680元。
「打新」難度增
不過，認購Magnum被戲稱為難中過六合彩，一手中籤率才得1%，就算頂頭槌認購的大戶或大散戶，都係分得兩至三手，實際分得到的股民數目相當有限，估計食白果兼蝕埋孖展息的散戶可能更多。就算呢隻夜場第一股升到飛天，真係可以同大股東及管理層一齊開香檳慶祝，相信都無乜幾多人。
我係bastillepost.com的專欄講起中環茶友中，有位騰雞王近日加入「打新」(認購新股)大軍，竟然係咁易搵錢的環境下損手，有興趣者不妨上去睇吓。講起呢位騰雞王，不妨講多兩句，佢股齡差不多有30年，入伍時間係87年股災前，當時佢初出社會，買股嚐到甜頭，好彩性格保守，唔敢去盡，結果喺大崩盤時仍然唔使贖身，但經此一役，騰雞變成佢最大性格弱點，經常阻住佢係股市搵大錢，得到的回報就係至今為止，佢仲係市場內載浮載沉，大錢搵唔到，小錢就年年都有得執吓。
騰雞王打新打着菠蘿，誤信財經報紙認購咗隻原生態牧業(1431) ，結果損晒手，佢畀我笑到臉黃，心有不甘反擊，話自己認購新股都有體會，佢話最和味係龍頭國企年代，當時係散戶人人收利是的年代，新股大多數掛牌即升，而且抽親一人至少有一手。後來，參加抽新股遊戲者漸多，雖然掛牌賺錢機會仍高，但一人一手幾乎成為絕唱，現今仲周不時出現破底的抽獎陷阱，抽得少未必中，抽得多一不小心就贏粒糖、輸間廠。未來上市新股咁多，風險隨時再增，搞到佢對「打新」興趣大減。
內銀跌的升不了
騰雞王呻到樹葉落之餘，就話依家咁多新股上市，搞到眼花繚亂，最新內地新股重啟唔係咁順，可能仲多民企殺落香港，佢哋除咗正常途徑申請上市外，好可能會諗買殼，相信炒殼熱潮方興未艾，所以他都準備減少其他股份，挪移多啲資金去炒殼，如果畀佢扑番一、兩隻，咁回報可能仲好過打新都唔奇。
騰雞王想去炒殼，同佢對個市有啲戒心不無關係。呢排個市確係有啲陰陽怪氣，昨淡友借住匯豐中國製造業PMI跌至6個月低位，加上內地拆息再飆升，一下子將港股推低三百幾點，上星期矮仔上樓梯辛辛苦苦爬上來的升幅一下子無晒。恒生指數全日最多跌360點，收報22733，仍跌348點；國企指數更跌達217點報10109，幅度逾2%。唯一較好係大市急插，成交不增反縮至684億元，希望急跌完可以穩番落嚟啦。
個市呢吓急插其實唔令人奇怪，因為早兩日個市借住內地央行放水炒上，陸羽仁已講咁樣炒放水，唔知可以炒幾多日，而家睇番，早兩日反彈根本係假升，個市見到強勢板塊好似濠賭已升得太急，靠內銀等板塊根本無能力大上，所以雖然人行繼續放水1200億元人民幣任逆回購操作，仍被市場指金額不及預期，內地拆息再飆過，將放水的利好作用抵銷，把內銀股全部質番晒落嚟，應驗一句升的跌不了，跌的更加升不了。
陸羽仁
金融High Tea 舊文