金融High Tea 2014年1月10日
唔散瘀無得大好
2014年01月10日
大市昨日一度回跌三百幾點，扯上扯落走勢唔太令人意外。現時港股仲係受內地從緊的貨幣政策影響，同時A股啟動重新上市，改革進入陣痛期，成日「斥吓斥吓」，港股受到牽動，好難當完全無事咁跳跳紮。
內地A股中午拉埋港股一齊滑水，恒指直至A股收市才略見反彈。恒指收市跌209點至22787點，抹去上日大部份升幅。國企指數仲肉酸，插177點，收10153點，大市成交723億元。中資金融股繼續拖低大市。恒生中國H股金融行業指數跌1.7%。國壽(2628) 跌2.6%；工行(1398) 跌2%；建行(939) 跌1.8%，係前10隻表現最差藍籌。
銀行家︰明天會更好
早前陸羽仁同各位早已搵夠的銀行家傾偈，佢喺八十年代內地開始發展股市時，係第一代上去幫手搞重組同併購的先行者，現時已經賺夠提早退休歎世界。既然有機會請教老行尊，自然問佢點睇內地重啟A股上市啦。銀行家用樂觀口吻話，現時北京做法方向好正確，令佢相信內地股市明天會更好。
銀行家坦言，佢哋第一批搞上市公司，好多根本不成氣候，不是業務唔得，就係估值偏高，或者長期唔派息，變成大批殭屍股充斥市場，搞到死氣沉沉，現時中央大力改革，要抓緊企業管治，重啟上市希望可以放番一批有活力的公司上市，為市場帶來生機。佢相信經過咁樣大力清洗，先至可以徹底改善番市場質素，所以自己好支持三中全會提出的方向和政策。
聽完銀行家咁講，陸羽仁印象最深係佢話明天會更好。呢句話意味內地股市長遠前景睇好，但佢唔話今天會更好，又無話已經飛撲入市買股，即係話仲要等中央整番好個市，或者殭屍股清理得七七八八，前景就會好嘞。
呢位行尊的反應，同好多大行和外資睇法相近。外資對新政府勇闖改革深水區拍手叫好，認為咁先可以為市場帶來真正的希望。要留意的是，?家叫好的是大戶，佢哋買貨唔係博賺一、兩成，入貨量唔係講緊三幾百萬，故此佢哋係睇緊市場有無範式轉移，或者至少係大轉勢，內地現時增強市場機制角色，意味民企機會增多，財富流入民間，有機會激活經濟，外資當然覺得係食大茶飯機會，但要煮大茶飯係要時間，等啲瘀血流清，先有得大翻身。
又到內房炒反彈
昨日中資金融股唔掂，內房股卻逆市造好。龍頭股中海外(688) 及華潤置地(1109) 齊升2.8%，合景泰富(1813) 獲美銀美林維持「買入」評級，股價更大升超過半成。去年內房銷售錄得30至100%增長，表現強勁。今年估計有10至15%增長已算不俗。房價方面，一線城市供不應求，料仍會有10%升幅，二線城市視乎個別地方的供求，三、四線城市因供應過多，房價或會下調。
一、二線城市地價急升，或會增加開發商補充土儲的難度，內房股中，法巴首選中國海外，因有望獲母公司注入3000萬平方米土地儲備，解決拿地困難問題。另外，美銀美林亦以中海外為首選，原因係淨利潤率為行內最高之一，又有境外融資優勢，目標價睇27元，中海外昨日收報22.3元。
睇番中海外近5年走勢，由2009年8.4元一路炒上至去年初的25元最高位，之後連續5次挑戰頂位都無功而回，可見房價一升中央就打壓，已成內房股頭頂的懸劍。
陸羽仁
金融High Tea 舊文