金融High Tea 2014年1月13日
十年河西 要知應對
2014年01月13日
美國就業數據上周五出籠，雖然12月失業率跌至6.7%的5年新低，但非農業新增職位只有7.4萬個，遠低於市場於市場預期的20萬個。雖然聖路易斯聯儲銀行主席布拉德話，儲局關注失業率下跌多過新增職位減少，儲局政策不應只按個別月份的數據而作決定，但市場認定出現這種數據，本月儲局會議勢難再收水，金融市場就因應收水前景下降而大幅波動。
美股好淡因素對沖了，雖然就業數字唔好代表經濟唔好，但收水機會下降，對股市的影響一正一反，令股市無大升跌，杜指上周五收報16437點，微跌7點。但就業數據可能令收水放慢，意味美元供應持續增加，卻利淡美元，追蹤美元兌6種主要貨幣的美匯指數上周五跌0.4%，歐羅兌美元升0.5%，報1.367美元，創逾一周高位。金價升幅更大，現貨金價每盎司報1248美元，升1.7%。收水可能放慢，聯儲局持續買債，令債價向上，債息向下；美國10年期國債債息跌至2.85厘，上周初債息曾走到3厘樓上，如今顯著回吐。
收水放慢 阿爺救市
聯儲局可能放慢收水，對港股溫和利好，而美國就業情況咁樣，可能2015年都加唔到息，對地產股有穩定作用。
內地方面，阿爺又有救市新姿態，早前放保險資金入市，好似對A股止瀉效用有限，阿爺再出最新一招，將內地新股審批暫停到3月。過去1年多內地一直停止新股上市，去年底市況好番少少，阿爺又重新放新股入場，內地個市在12月開始散，到家上證綜指都跌到去年6月的低位，睇嚟阿爺又頂唔順要出招，今次的手法係暫停新股上市兩三個月。
中國證監會發言人鄧舸話，除了已經通過審查並已核准可上巿的公司外，其他公司須「補充其2013年全年的財務報表」，因為準備有關文件需時，預計起碼要等到今年3月，才會再度審批新股上市，在此之前，A股巿場將不會再有新股獲批。截至上周四，正排隊上巿的企業總數共701家，當中只有34家已獲核准上巿。即係話呢34家批咗無辦法叫停，其他667家公司就對唔住啦，你哋又要再等。是否3月可以再批，我諗主要唔係睇財務資料齊唔齊，而係內地個市好唔好，若果唔好，實會再推遲。
按內地出招的慣例，初時未必止得住跌勢，但招數愈出愈多時，個市最終必有反應。或者想買A股基金都唔使急，仲有3星期就過年，過年前資金又例必緊張，等到時A股插得深啲，可以吼吓A股基金。
渣打重組 一葉知秋
渣打集團(2888) 負面消息不斷，繼上半年出現11年來首次盈利倒退後，渣打上周四公佈救亡行動，兩名集團執行董事年中離職，又合併個人銀行及企業銀行業務。渣打不否認重組是為降低成本及增加效益，合併可裁減兩大業務中重疊部份，特別是減少中後台部門的重疊。
渣打去年8月公佈中期業績，去年上半年純利按年大跌24%至166.2億港元，當時解釋是為韓國業務作出10億美元商譽減值，以及債務公允值變動的影響而已。市場反應未算太差，當時股價還有182.8元。今次公佈業務重組，股價就由公佈前的170元，連跌兩日，到上周五收165.7元，市場似乎覺得渣打的情況不如公佈中期業績時說得那麼輕描淡寫，開始要重組業務削減開支救亡，所以股價都回得幾快。
我估睇渣打唔好睇得太微觀，佢現價市盈率10.7倍，52周高位215元，是去年3月造出的，現價市盈率唔算高，亦比高位回落咗23%，若然基本因素無問題，可以低撈睇長線，但我有啲擔心渣打基本因素有問題，主要是新興市場的問題，非渣打自己可以扭轉。
近年股市的高潮在2007年，但匯控(005) 在此之前已露疲態，主要因為佢在美國和歐洲都有重要業務，深受由美國觸發的次按危機所累，當時市場認為渣打把業務集中在新興市場上好好多，在2009、2010年也好像如此，渣打強過匯控。但渣打業務近年也放慢得很快，但大家未注意到，問題的根源非常宏觀，就是一大片新興市場根本有問題，過去兩三年美股強包括中國在內的新興市場股市弱，就是這種病變的表徵。
有一本書可以為新興市場近年整體走弱的原因，提供較全面的解釋，此書名為《Breakout Nations︰In Pursuit of the Next Economic Miracles》(中譯《一炮走紅的國家》)，作者是大摩的新興市場基金經理Ruchir Sharma(夏爾馬) ，夏爾馬在書中生動描寫了新興國發展的軌跡，中國是先行者，從1998年開始，中國每年以不低於8%的速度持續增長。到了2003年，這是世界前進道路上一個沒有得到充份認識的轉捩點，從這一年開始，中國的好運氣突然一下子傳播到了幾乎所有的新興國家。除了中國外，大型新興市場如印度、巴西和俄羅斯的經濟都開始狂熱起舞，同樣大幅增長，最生動的例子是俄羅斯，由2002到2011年的10年中，佢嘅人均國民收入從1500美元，毫不費力地猛增到1.3萬美元。
熱錢流走 十年疲態
夏爾馬指出，新興市場由2003年開始的經濟猛增，和美國的低息政策帶來的熱錢流動分不開，美國在2000年科網股爆破和2002年911事件後，大力降低利息救市，低息一方面造成美國債務上升，消費猛增，推動了新興市場的出口。另一方面造成世界範圍內的快錢(easy money)洪流，令熱錢大量流入新興市場。在20世紀90年代，流入新興市場的私人資金只佔新興市場的國內生產總值僅2%，到在2007年已躍升至9%。
在2007、2008年美國金融海嘯，令西方投資者對美國和歐洲喪失了信心，一度令資金加速絕望地轉向了東方和南方。在2009年和2010年，數千億美元流入了新興市場的基金，對波蘭和秘魯、印度和印尼、中國與俄羅斯，幾乎不加區別。這種「宏觀狂熱」令所有主要新興市場的股票走勢愈來愈同步。2011年上半年，新興世界中表現最好和表現最差的主要股市之間，只有10%的差別，這是歷史最低水平，同時也是羊群效應的一個危險提示。接下來就是爆泡，當2011年美國稍稍露出穩定跡象後，再加上新興市場因為美國放水通脹高升要開始緊縮時，資金急促回流美國，新興市場神話不再。
新興市場 基金咪掂
夏爾馬預測新興市場的疲軟沒有那麼快就結束，它們正經歷痛苦的去槓桿化的過程，而當中好的國家和壞的國家有很大差別，關鍵在那個國家的經濟體制，確定它是朝着創造性還是破壞性的方向移動，是在不同收入階層、不同民族和不同地區中創造均衡的增長，還是導致危險的失衡。
宏觀嘢講住咁多先，再講多啲怕悶死你，以下是投資建議︰第一，不要以為過去新興市場好，未來就會好，以整體而言，新興市場仍然未走出困局，所以不要盲買新興市場基金。第二，好似渣打這類重注投資新興市場的公司，過去10年做得好，未必係管理得好叻，只係食到個勢，但十年河東，十年河西，跟住要打逆境波，做得好係要做到跑贏大市，唔係咁容易，股民不要保留太多舊記憶，對渣打盲目樂觀。第三，未來中國得唔得要睇習主席改革成唔成功，他走的方向很對，但要看能否行得下去。第四，過去兩年中國股市唔得，帶住港股呆滯，因為熱錢根本唔睇好新興市場，未來大勢仍然不變，所以未宜對今年本港股市睇得太高，很可能也是上落市，升得高唔好追。
陸羽仁
金融High Tea 舊文