陸羽仁 BLOG 2014年2月11日
人生如搞公司２
2014/2/11 9:56:24
網誌分類: 經濟
美國睇緊一個耶倫市，無人敢鬱。美股昨日先跌後升，平淡渡過。杜指開市即跌，市場以為連續兩日大升後，會些較大的調整，但跌60點已見底回升，之後逐步扳平，收市倒升8點，收15802點；標普500指數漲3點，收市重上1800點。
大市表現頗沉悶，觀望氣氛濃厚，主要係等待聯儲局主席耶倫今晚出席國會衆議院金融服務委員會(HFSC) 聽證會，會講乜。
耶倫將於美國時間朝早8點半發表未來半年的貨幣政策，雖然分析普遍預期，耶倫的證詞會與聯儲局公開市場委員會(FOMC)最近一次的貨幣政策會議聲明差唔多。不過，今次係耶倫坐正後首次公開露面，市場會有多些好奇。
戲肉會係10點開始的發問時段。市場估計議員會問耶倫兩個與退市相關的問題：美國就業情況及新興市場危機。聯儲局已經連續兩次削減買債規模，預計退市進度也不會改變。聯儲局不斷強調退市係基於就業市場狀況出現明顯改善。而非農就業數據已經連續兩個月遠差過預期，去年12月，市場預期新增職位只有19.5萬，結果只有7.5萬，1月預期18.5萬，新增職位卻只有11.3萬。是否反映就業狀況有惡化的趨勢，還是短期由天氣影響?究竟耶倫如何解釋當前的就業市場狀況呢？我估耶倫語調是溫和看好就業和經濟前景。
另外，聯儲局退市，引發新興市場資金外逃，多個新興市場的匯市、股市以至經濟爆煲，危害全個股市及經濟。而最近一次的FOMC會議聲明，隻字未提。究竟耶倫如何看待最近新興市場的動蕩？我估在美國眼中，只要唔燒到自己，對新興市場唔會太重視。夾埋應該係耶倫對未來行動沒有太強烈暗示，但市場推想聯儲局會不斷減放水規模。
再續網友La早前問起努力係唔係可以到55歲有1000萬的問題。昨天講工作，管理人生如一間公司，首先要令自己有不斷增加的現金流，現金流弱，整間公司都較難長大，所以若做一份工唔夠，就做多半份，增加現金流。
第二樣是儲蓄，儲蓄如公司的保留利潤，是有否能力投資的關鍵。我聽前香港電訊總裁張永霖講過，佢40歲之前都未買樓，搵得來使得去。佢係打工皇帝，花樣中年，千金散盡可以搵番，普通人唔得，一定要儲蓄。
我有兩個朋友，都係會去旅行玩樂，朋友甲賺錢多，但佢事無大小都花，根本用錢不去想，花很多無謂錢。朋友乙賺錢少一半，但花錢好集中，一年去一次較長的旅行，大節目加生日加結婚週年慶祝係會好捨得花，但平日用錢幾慳，呢啲叫做「有目標花錢」，結果到40歲時朋友乙的資產係朋友甲五倍以上。記住細水長流，乜錢可以流曬，管公司都一樣，好多日常開支唔覺唔覺用多好多，一減下來，可以節省好多。若無法開源時，就要節流。
可惜而家樓價太貴，否則買樓是最好的強逼儲蓄，首先將你手上一筆自由現金取走，唔俾你亂投資。然後為供樓又逼你月月儲錢，其三是不動產不易買賣，唔好升少少就走咗，容許資產增值，係無紀律無節制的人投資好選擇。當然，我不覺得如今是買樓好時機。
所以儲蓄跟投資一樣，紀律最重要，花費比你身份應花低一至兩級的消費，你會使得舒服，亦可儲錢。當然，找一個願意和你同步的伴侶就太重要了。
明天再講投資。
陸羽仁
回應(3) 我想回應
陸羽仁 BLOG 舊文