陸羽仁 BLOG 2014年2月27日
無望城市
2014/2/27 上午 09:37:20
網誌分類: 經濟
香港的預算案其實對大市是壓抑性的。曾幾何時，80、90年代之時，財政司公布預算案，真係要坐在收音機旁邊聽，睇吓有乜嘢炒，地產、航運、商業、金融，睇吓炒邊瓣。
如今的預算案，既無驚喜，乜無秘密。今次預算案的特色是減派糖，事前唱曬出街，公屋免租兩個月變一個月，差餉減免少一半，1萬元退稅額持續，乜都知道曬，從管理期望的角度睇好好，係管理到大家無期望。
我關注產業，關心經濟，睇完預算，諗唔到可以興旺那些產業，這才是一個問題。香港從那時開始，變了一個不能燃點希望的城市?
美國新屋銷售創了五年多新高，但烏克蘭局勢再度緊張，美股先升後回，收市原地踏步。標普500指數收平，報1845點，杜指升19點至16198點，納指微升4點，報4292點。大市成交亦偏淡。
美國近期的經濟數據大多不及預期，分析普遍認為係受持續的惡劣天氣影響，唔係經濟基本面有變。昨日公佈的1月新屋銷售數字好番，銷售年率達到46.8萬幢，較上月勁升9.6%，猛增至五年半新高，遠超市場預估。咁靚仔的數據，令投資者認同了上述的睇法。
有分析指出，近排好多交易員見到美國經濟數據麻麻，以為有機可乘，力沽美股，結果中曬招。美股不跌反升，但去到咁上下又遇阻力，標普500指數雖然多番嘗試，都突破唔到週一上過的歷史高位。不過亦唔見較大的回調，企得好硬淨。空軍唔願平倉，又唔敢加碼，非常痛苦。
昨日就有一個典型例子。包括 TJX Companies, Target, Lowe"s, Dollar Tree， Abercombie&Fitch等多家零售美企公佈去季業績，但都係盈利達標而營業額欠佳，兼且唔睇好今年的盈利前景，但股價表現強勁，Abercrombie & Fitch勁升超過一成，又係「好過預期」、或者「前景好番」所致。零售板塊跑贏大市。
有交易員解釋，零售企業雖然唔睇好盈利前景，但覺得情況又未至於好惡劣。隨住天氣好轉，生意又有番喜色。例如Macy’s表示上星期銷售已回升，Home Depot的生意在嚴寒天氣下也不算太壞。好友搵到一個反擊的理由，就頂住個市，個市就跌唔落去。
不過，跌唔落去，又唔代表可以炒上。又由於外圍局勢唔係好對路，例如中國經濟放慢，再加一個烏克蘭政局不穩，打擊投資氣氛，令到投資者唔敢落注。大市只能夠打橫行。
陸羽仁
回應(4) 我想回應
陸羽仁 BLOG 舊文