金融High Tea 2014年2月12日
散戶睇跌 大戶夾升
2014年02月12日
過咗春節，內地錢荒一如預期紓緩，掛在A股頭上的懸劍鬆一鬆，大陸股市重開後，結果連升幾日，帶動番港股向好。馬年開盤，港股跌到阿媽都唔認得，股民變成馬上輸錢，好彩內地生生性性，喺低位有支持，撐番高港股，由內欄一直殺上，追番落後於大陸的升幅。由於資金轉番鬆動，短期氣氛好番啲都唔奇。
周一外圍同大陸同時造好，人人以為香港必升，點知佢高開後即馬力不足，跟住竟然倒跌。到昨日外圍同內地其實升得唔多，但港股就借頭借路大力挾上，頗有大戶玩嘢的味道，唔排除佢趁市靜「揸𨋢」，散戶以為佢升佢就挾跌，散戶以為墮馬啦，佢又失驚無神玩升。港股全日造好，一度仲升過四百點，可惜未能企穩兩萬二收市。
市靜「揸𨋢」話咁易
大市昨日高開44點後，買盤逐漸出現，帶領港股升穿十天線，填補近日下跌裂口，之後投資者入市轉趨積極，最後恒生指數收報21962，升383點；國企指數收報9856，升243點。A股持續攀升，內險股表現標青，國壽(2628) 、平保(2318) 彈近5%。另外，友邦(1299) 及建行(939) 為升市主力，合共貢獻88點。雖然彈幅咁勁，大市成交金額6667億元，喺個市靜靜地之下，大戶要「揸𨋢」話咁易。
早幾日我寫過股壇大俠彼德林治口中的「星期日睇報紙現象」，意思係星期日報紙專係搞出不同專題，多數係各種長遠危機的大題目，睇完好似世界末日，咁就乜股都唔買，彼德林治係基金經理，佢認為唔應該誇大風險，變成過份保守。
我喺大師理論附加一筆，叫做「星期日睇經紀報告現象」，意思就恰恰相反，因為經紀係做生意，平日就出唔同報告叫人買嘢，好多時就做唔同主題報告，搞出好有創意的命題，目的只有一個，就係叫人炒嘢，呢啲厚疊疊的報告平時唔得閒睇，星期日投資發燒友睇完，星期一開市就靈感十足，大有衝動入市買嘢掃貨。
好似摩根大通就發表咗報告，主題係唱國企指數估值平，估計最多有兩成升幅，當中兩大概念股份將有作為。報告指出，國企指數現估值為歷史低位，國指預測市盈率只有8倍，估計未來數周大市出現反彈，國指料有15%至20%升幅，相當於預測市盈率10倍，因此建議買入中國股票。
有銀彈就有話事權
摩通續稱，內地兩會將在不足一個月開幕，料新中國概念股將有作為，包括醫藥、環保、電子商貿及科網股，因該類股份自高位 調整一成。另外建議掃入內銀股，主要由於股本回報率(ROE)高，估值及息率吸引。
該行建議首選買入平保(2318) 、中國生物製藥(1177) 、龍源電力(916) 及騰訊(700) ，目標價分別為84元、6.6元、9.8元和580元。除咗摩通，美根美林又喺碧桂園(2007) 公佈1月銷售數據後，大讚其營運表現，重申「買入」評級不變。
大行係咪想整番個遲來的二月升市，暫時仲要觀察。我經常都話，意見好多人都有，問題係只有觀點，只能變成特約評論員，重點係有無實力，喺股市實力就係銀彈，大行可以指揮大戶銀彈，咁佢哋嘅報告就變咗唔係普通人意見囉。
陸羽仁
金融High Tea 舊文