金融High Tea 2014年2月20日
賭股「吊吊揈」
2014年02月20日
陸羽仁昨日在專欄講起有澳門街老友到訪，談起澳門賭牌續約，有機會縮短年期，消息一出，十幾隻龍頭股應聲腳軟，咁情況唔知係啱啱定係剛剛，總之市場理解就係同續牌年期未明朗有關。
澳門?家有六家持牌公司，佢哋市盈率普遍有三、四十倍，而且全部市帳率奇高，咁即係話投資者唔單止預期佢哋盈利有高速增長，而且仲要有番一、二十年時間搵錢，忽然話續牌時間可能縮短到只有五年，加埋?家餘下時間，經營權豈不是只有10年？豈不是好驚嚇？
續牌涉國家利益
市場對呢個議題咁關心，今日不妨講多兩句澳門街老友的觀點。據佢所講，澳門賭牌續約唔係特區事務咁簡單，係同中美大棋局有關。美國佬同中國佬經常博弈，國與國的關係，表面成日講仁義道德，實際係講點樣益到自己，即係國家利益先係最重要。當年澳門開放賭權，有人話澳門特首畀咗一半賭權畀外資，呢樣嘢係咪話一個人可以決定呢？咁講出嚟都唔會有人信，一個說法係，當年美國佬同阿爺講數，北京希望申辦奧運，想美國支持或者唔阻頭阻勢，咁有乜嘢可以交換呢？
有人話，依家澳門賭權雖然有一半係外資啫，但其他好多係港澳資金喎，而且上咗市，好多小股東係老散，咁續牌五年，會唔會殺錯良民㗎？澳門街老友話，澳門賭牌條件係公開文件，無得呃人，投資者願者上釣，現時股價炒到咁高，同北京和澳門政府無關噃。從發牌角度講，無理由分開外資處理啫，好似第一次批出賭牌，全部都係二十年，葡京由於已有博彩設施，故此早兩年起計，其他就預咗兩年「裝修期」，可見大家都好均真。
澳門街老友講到好似中央隨時收牌都得，咁睇落咪好牙煙？佢話，中國係大國，美國又係大國，行事必然講利益，大家都知唔續牌會好大鑊，當然，持牌公司都唔可以當續牌係「老奉」。?家全球賭股，最大係澳門有牌的威尼斯人，跟住係銀河(027) 、金沙(1928) ，足見美資食咗大嚿肥肉，從投資角度，續牌五年好似搞到投資者「吊吊揈」，從政治角度，咁樣就正好有利講數，大家可以鋪鋪清。?家美國話重返亞洲，中日又話開戰機會不斷上升，美國佬要換，都有大把籌碼在手，不過，濠賭股係政策風險股，呢樣嘢就不言而喻喇。
產業多元化有古講
除了續牌牽涉政治因素，另一樣檢討就係博彩公司點樣協助澳門產業多元化，同大家點搞橫琴角力，老友話都仲有故講㗎。
濠賭股由於受到續牌消息影響腳軟，究竟衝擊有幾大，照睇應該不會有即時衝擊，但長遠就變成估值的制約因素，因為傳中央在澳門賭牌的續牌問題上，會較多從中美關係方面着眼，或傾向發出年期較短的牌照，牌照年期或縮短至10年或5年。濠賭股開市就普遍受壓。銀娛報71.6元，跌2%；澳博(880) 收報23.75元，挫3.5%；金沙、永利澳門(1128) 、美高梅中國(2282) 、新濠(200) 都跌。好彩喺匯控(005) 力撐及內地上證指數創兩個月高位推動，恒指最終造出四連升收市，恒指收報22664，升76點；國企指數收報10057，微跌不足1點，大笨象連升7日力挺大市，為恒指貢獻62點升幅，全日升1.5元，收報84.85元，算係威番次。
陸羽仁
金融High Tea 舊文