異動空間：逆市尋寶睇實兩股 - 魏力
■昨日逾千隻股份下跌，對散戶而言簡直是股災。
旭光(067)遭沽空機構Glaucus出報告怒踩，急瀉後停牌，觸發民企股災；另外納指插水，騰訊(700)重創半成，拖垮科網、手遊、手機、支付及彩票股，加上風電、光伏等新能源股散水，全日逾千股份下跌，直頭係股災！新一輪跌市一觸即發，呢個時候只能盡量撤退，靜觀其變，方為上策。
舊經濟股相對硬淨，係因為一早已大跌，但基本因素疲弱，最多只能低位徘徊，追入值博率不高。至於濠賭股仍處高位，相當高危，隨時成下輪洗倉對象。咁嘅市況，寫推介認真頭痛！翻箱倒籠，總算搵到兩隻細價股，圖表吸引，能在寒風中屹立不倒，應有後著！順龍控股(361)上月底發盈喜後，股價輾轉向上，昨逆市升一格，收0.62元，成交配合。小注跟進，可博三重驚喜：本周五業績、派息及賣殼憧憬。目前市值不足3億銀，且賣盤消息頻傳，空穴來風，未必無因。
另一隻係遠東控股(036)，噚日下半場突然發力抽升13%，突破1月以來橫行區，成交急升。上月以現金加股票向邱達根收購半山物業，配股價0.425元。完成交易後，邱生的持股量將升至31.62%，連同邱氏家族合計達47.18%，增持背後料有後著。目前市值僅2.2億元，莫非為賣殼鋪路？睇走勢，如升穿5毫則可以一試。
魏力
http://www.facebook.com/2012jason
上一則: 何車500：華電仍具上升空間 - 何車
下一則: 點股壇：華創短線難樂觀 - 齊明
異動空間 - 魏力 舊文