中環在線：揸9.57%股份做次大股東Apex掃美聯挑戰黃建業 - 李華華
■Apex不斷增持美聯，加上獲馮銳森出山擔任顧問，隨時令美聯風雲變色。設計圖片
美聯(1200)第三大基金股東Apex代表繆宏邦，本月中搵來美聯創辦人之一馮銳森擔任顧問，又話無意買起美聯或踢人出局，但轉頭已出手，上周五大舉增持美聯，最新持股9.57%，成第二大股東，雖然較大股東黃建業持有16.73%，仍有距離，但如果佢跟其他股東聯手或繼續增持，隨時可以威脅黃建業嘅大股東地位。
Apex不排除再出擊
睇形勢，Apex來者不善，呢個基金舊年底披露持有美聯7.3%。聯交所最新資料顯示，Apex上周五斥資6,266萬元增持，持股量升至9.57%，輕微多過原第二大股東Sun Life Financial。
Apex代表繆宏邦噚日解釋，增持美聯，係因為之前同班股東開完會，大家都認為整體投資都會做得更好，決定增持。至於會否繼續增持，甚至超越黃建業成為最大股東，繆宏邦就話：「股東之間未傾到呢個問題，一切有待美聯業績公佈後先決定，仲要睇埋股價同市場貨源。」咁即係唔排除再出擊啦。
黃建業回覆，Apex非傳統基金或機構性投資者，由私人投資者組成，同公司溝通嘅方法有別於一般投資者，表達意見唔循正常渠道咁話，佢似乎都係沉著應戰。事實上，自從Apex浮面，佢由舊年12月中開始增持，至今年1月底，累計斥資接近1億元，力保控制權。
剛從內地回港嘅馮銳森就重申，佢主要對美聯運作提供意見，一班被炒嘅美聯舊部，暫時冇搵佢幫手，如果佢哋開到聲搵佢，就到時先算喎。
美聯今日會開董事局兼宣佈業績，唔知Apex會否有人踩場呢？大家都係買定花生等睇戲吧。
李華華
mailto:LiWaWa@AppleDaily.com
■美聯太子女黃靜怡(左)與黃建業領導地位有危機。
上一則: 樂香園：內地樓市危危乎 - 密西比
下一則: 中環在線：萬里長子現身力撐中國鐵聯 - 李華華
中環在線 - 李華華 舊文