陸羽仁 BLOG 2014年3月28日
資金大挪移
2014/3/28 上午 09:51:36
網誌分類: 經濟
昨日美股表面睇好似無鬱，杜指只跌4點，其實發生緊大挪移遊戲，中小股和新科技股跌，新興市場股升。
睇杜指和標普500指數好似無嘢，但睇羅素2000指數(中小股)、納斯特克指數(科技股)、和杜瓊斯運輸指數都係處於5週低位。科技股、新媒體股特別差，這個月有雙位數的跌幅，包括Pandora, Netflix, Yelp, Twitter 同Facebook都唔掂。昨日佢地都係插水焦點，其中谷歌跌1.6%，微軟回落1.1%，亞馬遜挫1.4%。安碩納指生化科技指數基金昨日早段就曾大跌3%，跌得太多又有人撈貨，至尾市又收復失地。
記得今年年初時是沽新興市場買科技股，如今反翻轉，新興市場股好番，新興市場ETF連升6日，升到今年高位。呢啲基金買重中國和巴西，而佢地同商品市場有高度相關，過去6日中國基金(FXI)升6%，巴西基金(EWZ)升8%。其他新興市場基金都強，土耳其升7.5%，智利升5.8%，印度升4.9%，麥西哥升4.2%。
點解有資金大挪移，似乎有兩個理由，第一係近歐洲基金沽科技股轉賣新興市場股，美股呢幾日都係開市強，到早上10點見咗頂，跟住就開始弱，可能係歐洲資金近收市就開始沽美股買新興市場股，唔想揸美股過夜。
第二，另一種分析指大市之所以腳軟軟，係時近季尾，又係基金經理整靚盤數交差的時候，此前累積升幅比較多的股票，一回吐就自然成為「了結」的對象。套回嘅資金去曬邊呢，睇美國10年期國債債息昨日由2.71厘急跌至2.68厘，即係多人買債令債價上升，估計資金係流入債市過過冷河，唔敢在季結前買嘢睇睇大市走向再步署。
美股走向會影響港股走勢，本地科技股咁弱，起碼要過埋季尾，到下季開季先至再有基金敢買囉。
陸羽仁
回應(0) 我想回應
陸羽仁 BLOG 舊文