一周兩件：金天醫藥值博 - 錢雋
■金東濤任主席的金天醫藥，有實體零售網，有直供模式經驗，搞網購係如虎添翼。資料圖片
二線股大洗倉，有質素嘅都照俾掟到甩轆，金天醫藥(2211)亦唔例外。但講到實體零售業，金天嘅PE平霸；講啱發展電子醫藥商務，市值亦平過中信21世紀(241)九條街，「虛、實」兩相宜，金天大平賣！
金天係祖國東北最大醫藥零售連銷店及分銷商，屬架勢堂級數，而啱啱公佈2013年嘅業績，純利大增66%，到3.6億銀人仔，靚仔到痹。金天零售店794家，有過半數喺三、四線城市、鎮。照咁睇，阿爺計劃城鎮化，提高三、四線地區經濟動力，加埋提高對農民工醫療扶助，金天地區零售業，食到應一應。而集團直供模式，直接攞貨，再銷售畀客戶，毛利亦啖啖肉。
金天今、明兩年，純利係咁意增長20%，連上市招股攤薄反映，預測PE分別得9.4倍及7.8倍。場內國藥控股(1099)及上海醫藥(2607)預測PE，全部15倍樓上。
金天呢期主攻藥品網上零售，已經攞到省級經營許可證。喺2012年，祖國醫藥網購達到16.6億銀人仔，年增幅高達4倍。但呢個數額，只係上年藥品銷售總規模0.7%。祖國藥品電子商務，前景爆炸。
食正網購熱睇3.9元
而金天有實體零售網，加埋「直供模式」經驗優勢，搞網購係如虎添翼！但集團現價2.50元，相對上年12月招股價2.9元，仲要潛水，市值得50億銀，同樣醫網，中信21世紀市值(219億銀)係金天4.4倍！
報載金天電網4月開始營運，兼可能涉及「大合作」，好有遐想。4日後就係4月，好買金天，先博翻半番到3.9元，PE得12倍，市值得78億銀，目標價亦剛啱貼近招股時擬訂上限價。
錢雋
細價股專家
本欄逢周二、五刊出
上一則: 投資學堂：候低吸科網股 - 譚紹興
下一則: 炒友Blog：金隅估值大偏低 - 邱古奇
~TITLE_S~一周兩件 - 錢雋 2014年3月28日 舊文