陸羽仁 BLOG 2014年3月6日
牛市未完
2014/3/6 上午 09:49:59
網誌分類: 經濟
美國經濟數據認真唔靚仔，但係個市就跌唔落去。2月份私營部門就業增加人數以及ISM非製造業指數都顯著差過市場預期，褐皮書亦顯示多個地區經濟放緩，整體消費疲弱。
不過，美股表現硬淨，全日在窄幅波動，杜指收低36點，標普500指數收平，納指收高6點。支撐住上日強勢。
美國供應管理協會(ISM)稱，2月份的非製造業指數由上月的54下降至51.6。差過市場預計的53。其中就業分項指數重挫近9個百分點至47.5，係2010年3月以來最低。重災區係建築與批發行業。另外ADP公布同期的私營部門就業人數較上月增加13.9萬，低過市場預期，1月份的人數增長亦由此前的17.5萬大幅下調至12.7萬。
聯儲局公布的褐皮書，亦指出美國經濟有多處地區出現經濟放緩，甚至萎縮現象。主因則係受到嚴寒天氣影響到消費活動。
美國經濟數據唔理想，但大市投資氣氛未受打擊，美股上日創新高，仍然頂得住，無借勢炒落，股市恐懼指標VIX指數保持在14點下方穩定橫行，亦反映投資者對大市前景唔係咁憂心，其中一個原因係烏克蘭的緊張局勢，有逐步緩解的跡象，美俄雙方都暗示依然有意開展對話，油價回落至每桶100美元，投資氣氛好轉。
最近美股標普500指數和納斯特克指數皆上新高，部份股票喪炒，如科網股Twitter 及電動車股Tesla都係炒到你唔信，令部份市場人士擔心美股就快爆，甚至重演2000年的大爆破，不過CNBC財經名咀Jim Cramer就列舉多個理由，話美股牛市未完，即使回落，回完仲有得去。佢話第一個觀察是2000年3月大跌前，已見到好股份單日轉向高位回落，又見到好多公司高層沽股，而家無這些情況，相反地，仲見到公司高層買股，好似通用電器行政總裁Jeff Immelt這個星期就用佢去年全年花紅來買通用電器的股票。
第二，好多股票唔係在歷史高位，以市盈率計係在歷史低位，例如銀行股、零售股、或低檔技術股，貴錢好低，低到有併購者從中尋求價值，好似Barington Capital Group 就促使 Darden旗下的Olive Garden 和 Red Lobster兩個連鎖合併。同時又把自己的LongHorn Steakhouse 和 Capital Grille合併。大型併購活動持續，好多收購者正四出尋找機會。
第三，Cramer接觸很多專業投資者仍對大市抱懷疑態度，太多人睇得負面了，這就是股市可以繼續去的訊號。
所以Cramer的結論只是美股部份股份起泡，若手持炒到顛的股票沽出也十分正常，但股市整體未算顛，部份股票仍然便宜，不用估計牛市好快完結。
陸羽仁
回應(6) 我想回應
陸羽仁 BLOG 舊文