金融High Tea 2014年3月6日
膽大手唔急
2014年03月06日
兩會開始進行入宣佈政策方向階段，總理李克強報告唔算太過驚世駭俗，中央政府設定今年經濟增長目標為7.5%之餘，由於總理李克強表示經濟續有下行壓力，市場擔心能否達到7.5%目標，滬深股市在兩會召開後連續兩日回吐，上證最低跌至2050，收報2053，跌0.9%；深成指收報7298，跌0.7%。
內地股市跌，部份原因係尾市石化股沽盤增加，喺A股影響下，炒兩會概念的中石化(386) 都受壓，收市跌咗差不多1.9%。中石化本來炒中央產業結構改革，容許民企入股，昨日中央無乜重大經濟刺激，令到呢類傳統國策股跌咗落嚟。
太陽能股跑出兩隻龍頭
通常中央會議，領導會先講政策方向，細則慢慢先出台。中石化炒股權改革，股價由低位推高咗一成有多，總理報告未有好消息令股價回落，暫時仲可以當係消化獲利貨，之後得唔得就要睇有無消息跟尾。
對於引入民企，中石化董事長傅成玉對內地傳媒透露，要推進頁岩氣整個產業鏈的混合所有制經濟發展，例如開發、運輸、銷售以及其他可能增值的領域，強調要在能源開發過程要中實現全面深化改革的重要任務。不過，業內人士就懷疑，民資在非常規油氣開發環節並沒有任何優勢，引民資進入該領域開發有一定難度。中石化管理層打得開口牌話諗緊呢樣嘢，照計無理由無全盤計劃啫，何況，呢樣嘢唔單係中石化會做，中石油(857) 母公司聽講都話諗緊，唔似係傅成玉自己一個人的想法。
由於總理報告無驚喜，搞到港股上升乏力，全日走勢虎頭蛇尾走勢，恒指高開182點，到尾市收報22579，變成跌77點；國企指數收報9661，跌114點，成交金額649億元。
除了石油石化股，另一個板塊同兩會相關係太陽能股。呢個板塊現在炒得好開心，龍頭係分拆出來無耐的信義光能(968) 同興業太陽能(750) ，呢兩隻股升完又升，雙雙創出新高，興業太陽能仲爆升近一成，喺相關消息不斷傳出下，隱隱然成為炒作呢個板塊的焦點。
保利文化定止賺等食胡
興業太陽能主要經營專業的可再生能源系統集成商及建築承包商，主要從事設計、製造及安裝光伏建築一體化系統，同其他概念股一樣，都係市盈率唔平。
講起跟炒科網、手機、新能源呢啲高市盈率概念股，有中環茶友話要手急眼快膽又大，一見佢郁就撲落去。呢樣嘢啱唔啱，陸羽仁只能講各師各法，好似打功夫，有人鍾意埋身肉搏，有人鍾意長拳遠攻。
陸羽仁覺得雖然係炒概念，但點都要留意一下基本因素，要搵啱有中長期大浪的股份埋手，若然覺得個浪無咁快玩完，就鍾意等佢回一回先買，咁樣起碼無咗一買即跌的心理壓力，呢招叫做膽大手唔急，有利增加贏面。
炒新股自從超購王惠生國際(1340) 破底，捧場散戶無晒癮，令「打新」遊戲出現咗一股冷鋒。
今日掛牌的藝術品拍賣股保利文化(3636) 掛牌前，在暗盤市場新報41.8元，較招股價33元高27%，最高曾造42元，低見39元。暗盤總成交33.5萬股，涉及金額1380萬元。該股超額認購605倍一手中籤比率60%，認購兩手可穩取一手，由於佢概念獨特，若果分得一手半手，可以定好止賺位，擺係度睇吓先。
陸羽仁
金融High Tea 舊文