魚樂無窮：50元沽中移動的啟示 - 唐牛
■唐牛當年約50元沽出中移動，睇番轉頭，好明顯係「落錯車」。
哭股喪哭得興起，今日由虛擬重返現實，講嚇唐牛當年點樣完美演繹高追低沽。話說07年中央疑似啟動直通車，全城散戶變股神，大利市機改名提款機，只要肯買就贏；唐牛股齡尚淺，跟大隊齊齊買，有日聽到戰友講洛陽鉬業(3993)升穿20蚊(冇睇錯係20蚊)，應該好快見30蚊，心諗仲有10蚊水位，梗係唔執輸仆落去。結果係點？咪就係靚接火棒囉，一年後嘅海嘯價係1.46元，講跌幅仲慘烈過隻中國鐵聯(745)，最後反彈到5蚊時同佢講分手，埋單輸75%。
另一個經典就係金融海嘯期間，80蚊撈咗中移動(941)，比起高位計平咗五成，但當時個個要錢唔要貨，中移動作為當時龍頭股，俾人由頭沽到尾，唐牛最終喺恒指見底當日(08年10月27日)，極度恐慌下以約50元沽出中移動。直到今時今日，中移動都冇再見過呢個低位……
又到馬後炮時間，計番2007年高峯期，洛鉬市盈率去到40倍，市賬率8倍有多，比起現時嘅12倍同埋1.1倍，不敵地心吸力是常識吧。中移動方面，以當年全年股息2.743元計，50蚊嘅中移動，息率其實高達5.5厘，係有數據統計以嚟新高，𠵱家睇番轉頭，好明顯係「落錯車，如離開了幸福的高速路……」
呢兩役之後，唐牛明白到睇業績、財務報表嘅重要性，當一切變得不理性時，數字永遠都係你最可靠嘅朋友。
唐牛
上一則: 炒友Blog：中建築受惠國策可吸 - 邱古奇
下一則: 股場放大鏡：國美大舉回購顯信心 - 歐陽風
魚樂無窮 - 唐牛 舊文