中環在線：復活節過大海隨時要瞓街澳門酒店逼爆加價逾倍 - 李華華
酒店房已爆！復活節唔使諗過澳門
濠賭股近期回軟，但酒店房卻長Book長滿，如果想復活節假期過澳門住番晚但又未訂房的話，應該可以死咗條心。因為華華呢兩日已上了各大澳門五星級酒店的網站，以及到過信德中心主要酒店和旅行社櫃位，Sorry！房已爆滿！
■平時千幾蚊一晚嘅澳門酒店房，復活節期間已經加價到三千幾蚊。黃偉傑攝
陸叔：唔代表賭股買得過
根據網上資料，主要幾間五星級酒店於本月18至20日全部房間已租出。
華華親身走到去上環信德中心港外線碼頭的酒店和旅行社櫃位查問，澳門復活節期間五星級酒店只有金沙城內的康萊德酒店(CONRAD)有房，房價要三千多元，比平日千多元高出逾倍，其他五星級酒店一律無房。若退而求其次，房價也要二千多元，比平日不足千元的房價也高出逾倍。
雖然話復活 節假期澳門酒店房已爆滿，但華華問過不時會「過大海」賭兩手的沈大師沈振盈，以及經常過去澳門銀河睇戲嘅「陸叔」陳永陸，佢哋都話今個復活節假期唔會去澳門，仲話就算酒店房爆滿，亦唔代表賭股買得過。
沈大師話，公事繁忙，所以過唔到去澳門，仲話雖然澳門大受旅客歡迎，但相信澳門博彩收益未能維持高增長，睇淡濠賭股；又話以目前賭股股價，如果盈利未能錄得兩至三成增長，根本不能維持如此高估值。
陸叔同沈大師一樣，都唔係咁睇好賭股，話今年未有新場落成，即使酒店房「爆棚」，「咁又賺得幾多呀？假期好多房都俾賭場Book咗，有冇人住一件事，如果有個豪客賭十幾廿萬，酒店成本都返咗嚟啦。」
李華華
mailto:LiWaWa@AppleDaily.com
■每逢長短假期，港人都愛到澳門疏乎兩三日，令澳門酒店房供應緊張。
上一則: 雲籌網略：本土．反服貿與幕末攘夷 - 無謂君
下一則: 中環在線：73%強國家長：留學首選花旗國 - 李華華
中環在線 - 李華華 舊文