陸羽仁 BLOG 2014年4月17日
中國Twitter?
2014/4/17 上午 09:43:38
網誌分類: 經濟
昨日美股三大指數反彈1%以上，當中納指彈1.2%，以佢跌咗咁多計，反彈都唔係好有力。
美股大市走勢麻麻，新股都唔係好得，過去一個星期新股上市定價都有係比佢地原先講的價格範圍低(如果仲上到市的話)，但今個星期新股掛牌10隻有7隻跌穿招股價，可知新股幾唔掂。
嚟緊星期四(今晚)新浪微博分拆上市，我睇CNBC新聞個題Weibo—"Twitter of China"—set for Thursday IPO in US(微博—中國的Twitter—周四新股上市)。睇完我想笑囉，心諗鬼佬都食得我地多啦，今次新浪滾番佢地一次啦(上述兩句只屬講笑)。
我點解咁講，睇睇佢啲數先。新浪微博建議作價每股17至19美元，令整間公司估值39億美元，彭博估佢等如半間Twitter。新浪微博而家在190個國家有1.3億用戶(大部份用戶在內地)。公司經營數字麻麻，2014年第一季蝕4700萬美元，比去年同期多1倍。不過可能鬼佬以為佢真係中國Twitter，所以一間蝕錢公司可以用39億美元(約302億港元)咁高價上市。
鬼佬有好多嘢唔知，中國的Twitter唔係新浪微博，而係騰訊的微信。雖然表面睇新浪微博抄足Twitter只係俾人放140字的短博文，但微博過去幾年雖然在內地好興，現在已過時。新浪搞微博之初，曾經好熱，但後來騰訊微博殺上來，已打到新浪微博腳軟，據新浪人講，騰訊財雄勢大，幾年前iPhone好熱時，已攞住最新最搶手的iPhone，邊個名人去新浪開微博就送佢一部，搶走新浪不少網上大V(多粉絲的博主)。不過呢一兩年騰訊的微信興起，內地人轉行玩微信，玩微博的人減少，想不到微博這種2010年才興起的新興產業，3年就轉潮。
新浪微博就食住科網股炒作個勢，分拆上市。佢去年已開始裁員減虧，而家見的數字已執靚咗，未來亦見不到好多前景。係沽空之選。咁你話睇完個Weibo—"Twitter of China"—set for Thursday IPO in US，係唔係想笑呢?
講番美國個市，昨日新出爐嘅地產及工業產出數據靚仔，午間發布的經濟景氣狀況褐皮書亦顯示美國大多數地區的經濟狀況有所好轉。聯儲局主席耶倫的講話，亦安撫了市場對提早加息的擔心。再加上中國首季經濟增長好過預期，日本股市又大幅飆升，市場氣氛一片好景，美股第二日強力反彈，三大指數齊漲超過1%。杜指漲162點，收16425點；標普500指數升19點至1862點；納指升52點，報4086點。
聯儲局昨日下午發佈經濟景氣狀況褐皮書報告。報告稱，隨着氣候改善，美國大多數地區的經濟狀況有所好轉。聯儲局主席耶倫昨日在紐約經濟學會發表演說，談話中冇再提結束QE後半年可能加息的舊事，卻指市場上對於美國兩年內可望重返全民就業的預期「似乎合理」(quite plausible)。佢隨即補充，兩年時間距今仍然很遠，「有多麼長的路要走」，還要看其間事態的發展。關鍵係一、就業市場是否嚴重蕭條？ 二、通貨膨脹率回到2%沒有？ 三、什麼因素可能導致經濟復甦偏離正軌？不過佢認為通貨膨脹率低於2%之下的可能性，要高過升穿2%的可能性。另一邊廂，達拉斯聯儲主席費舍亦幫腔，稱對目前的通貨膨脹幅度感到滿意，不會投票贊成任何將通貨膨脹率推高至2%長期目標之上的政策。耶倫及費舍的「非常鴿派」言論，令市場放下了對於明年春天可能加息的心頭大石。股票恐懼指標VIX指數，回落近一成至14.18。投資氣氛醒省曬。
外圍方面，市場一直擔憂中國經濟唔掂會累街坊，阿爺昨日公布今年一季度中國GDP較去年增長7.4%,略高市場預期的7.3%。數據顯示, 期內服務業發展勢頭較好，工業企業景氣指數亦高於去年四季度, 中國3月份制造業採購經理指數(PMI) ，在連續3個月回落後微升，反映中國經濟正在釋出一些回暖的積極信號。
回應(4) 我想回應
陸羽仁 BLOG 舊文