異動空間：爆趣國策玩死人 - 魏力
強國政策認真爆趣，繼下令要「呵護」股市、嚴懲惡意唱淡後，為挽救樓市，杭州竟推出「限降令」，即係唔准跌！政策大意係，當局會為樓盤設定一個「參考價」，若層樓成交價低過參考價15%，就唔准簽約，亦即唔准賣。托市唔係好事？試諗嚇如閣下生意陷入困境，急需資金周轉，或者炒燶股樓，需要賣樓填數，你本來想劈價三成「急走」，也有人肯接貨，突然阿爺下令最多只能賣八五折，結果買家打退堂鼓，咁豈非迫賣家入絕路？自稱走市場經濟的國家，為了維穩二字，千方百計用行政手段幹預市場。樓價表面上可固定於「參考價」，營造跌唔落的假象，其實只是將供求嚴重扭曲，衍生更多社會問題，並延長樓價下跌周期，搞到樓市長期半死不活，就如現時的A股一樣。
講返個市，限購鬆綁消息一出內房股好似飲咗杯齋啡，醒神咗半日午後又回復昏迷，追貨九成又中伏。如此悶局唔知幾時才可打破，但買定離手，或者索性唔玩，總比炒出炒入為佳，個市一來冇水，二來冇氣氛，冇意思。
異動股留意中國聯塑(2128)，主攻水管及燃氣管道食正國策，第一棍突破20日線，可博上返250日線4.63元。
魏力
http://www.facebook.com/2012jason
上一則: 何車500：中建材PE 4.5倍 - 何車
下一則: 青心直說：尋絲路概念股 - 胡孟青
異動空間 - 魏力 舊文