中環在線：維港投資內地巡迴展覽周凱旋幫超人拉生意 - 李華華
周凱旋上廣州為超人維港曬冷
李嘉誠「超人」私人嘅維港投資(Horizons Ventures)一向低調，久唔久先公佈高科技新投資，好似人造蛋、超省電LED燈膽之類，最近竟然喺內地舉行「科技夾子」巡迴展覽，幫旗下投資公司喺內地打好關係兼拉生意，超人嘅紅顏知己周凱旋出席廣州展覽時，仲好似蘋果教主Steve Jobs咁上台演講，揭開維港面紗！
■周凱旋「背後」一定有超人。佢一手拿屏幕遙控，一手拎手機，呢個演講look確實有幾分似蘋果教主。 馮健鏗攝
公司僅得8人工作
呢個展覽上周一至五喺內地7個地方舉行，周凱旋上周四喺廣州現身，上台演講時，劈頭就用唔咸唔淡嘅普通話講，「這年頭沒有人願意當超人……到底多少人願意騰出時間，費精費神去解決、關心社會的問題、他人的問題呢？」再帶出超人點解喺2006年將三分之一財產捐畀「第三個仔」李嘉誠基金會，之後搞埋維港投資。
截至今年2月底，維港投資超過50間初創企業，涉及資金約27億元。周凱旋指「間間都咁鍾意，間間都好好」。
原來維港只得8人工作，每星期卻要審閱接近40間公司，決定係咪值得投資。消息人士話，入選嘅一定係近乎ready嘅科技公司，之後先會注資，幫佢哋建立網絡等等；若遇到構思太過初步嘅公司，就會轉介畀其他人。
周凱旋曾經話，每星期都會有一箱「玩具」送去長江中心畀超人過目。消息人士話，其實超人唔係當嗰啲係「玩具」咁簡單，對每間公司都係瞭如指掌；而本周又有新公佈。
至於點解今次展覽香港冇份，消息話，維港盡咗力，「但係各界嘅興趣都唔大，或同政策有矛盾，我哋就費事吖嘛，係咪？」
■做得超人嘅紅顏知己，連樽裝水都唔會飲錯其他牌子。
爆超人有焦慮晚上瞓唔著
作為超人嘅紅顏知己，周凱旋一向低調，謝絕採訪，為咗維港，佢先至肯高調演講，仲多次引用超人同佢之間嘅悄悄話，全場觀眾不禁豎起耳仔留心聽。 除咗用超人打開話匣子，周凱旋仲開一個玩笑，佢話「據說，李先生是華人首富好幾十年，為甚麼我用『據說』呢？是因為他告訴我『不是』，所以我都不太清楚他是不是華人首富」。
之後，周凱旋爆料，指超人有唔少焦慮，令佢「晚上睡不著」。第一件事係全球貧富懸殊嘅情況持續，中國情況更有可能惡化。
超人又擔心經濟發展與生態之間嘅平衡。最後就係信任缺失問題，佢引述超人講過嗰句「我知道、你知道、我知道你未說真話。」周凱旋可以用超人身家來開玩笑，又咁清楚超人為乜瞓唔著覺，仲可以講埋出來，盡顯佢地位唔簡單喇。
李華華
mailto:LiWaWa@AppleDaily.com
上一則: 炒家加碼賭歐元跌
下一則: 中環在線：人造蛋有售百佳飲頭啖湯 - 李華華
中環在線 - 李華華 舊文