智取大市：爛賬隨時重創內銀 - 晉佳
■以建行為例，去年撇賬比率2.66%，即係借咗100元出去，理論上確認2.66元係爛賬。資料圖片
上期講到，以綠城(3900)為例，內房股估值已經反映樓價由高位跌足六成(至少講緊三、四線城市)，而估值同樣超平嘅內銀股，有中央撐腰之下一定唔死得，仲要年年有增長。竟然股息率有成7厘，市盈率5倍，市賬率唔夠1倍，當中低殘估值反映嘅嘢，兩個字講曬──壞賬。
內銀股有好多壞賬，應撇未撇，或者係遲早要撇。最大問題係，壞賬要撇幾多，會有幾影響盤數。以建行(939)為例，佢去年客戶貸款和墊款餘額達到8.59萬億元(人民幣．下同)，貸款損失準備係2,287億元，即係撇賬比率2.66%。
簡單啲講，借咗100蚊出去，理論上確認2.66元係爛賬收唔番，你覺得喺目前環境下，咁樣合唔合理？
晉佳用咗撇除金融股以外嘅H指成份股作為參考，將淨資產負債率高過100%嘅企業嘅計息負債，視為潛在高危貸款，呢類潛在高危貸款竟然佔比高達40%，咪話唔誇張。單計一隻淨負債率超過400%、數字上瀕臨破產嘅中建材(3323)，一隻股計息負債已佔整體8%。相信非指數中資股、非上市公司同民企，潛在高危貸款比例只會更高。照咁睇，如果每100蚊裡面，有10蚊、15蚊係應撇未撇嘅爛賬，實在唔會令人意外。
爛銅爛鐵做抵押唔值錢
建行客戶貸款當中比較有風險嘅環節，第一係非抵質押類嘅公司類貸款，第二係個人住房貸款；前者總額係3.51萬億元，後者總額係1.88萬億元。假設兩部份總和裡面，有一成屬於爛賬需要即時撇賬，咁貸款損失準備會升到去5,390億元，建行每股賬面值就會下跌近三成，市賬率由0.98倍升到去1.37倍，都仲係平。假設爛賬即時撇賬比例係15%，貸款損失準備就升到去8,085億元，每股賬面值就跌54%，市賬率2.1倍，咁樣先算係合理水平。上述嘅計算，話畀大家聽，爛賬每增加1%，對建行估值有好大負面影響。
大家成日睇到新聞講內銀借錢幾咁寬鬆，就算係抵質押貸款嗰啲，究竟係咪好穩陣？就以鋼貿、銅貿作為例子，客仔將銅、鋼抵押畀銀行，就可以換筆平錢番嚟炒樓炒股，甚至再P2P借錢出去。炒燶咗隨時債仔消失唔還錢，剩番爛銅爛鐵又唔值錢。事實上，晉佳上述講爛賬比例對每股淨資產影響，未有計及抵質押貸款，但實情唔係絕對安全，鋼貿、銅貿只係其中例子。
四大內銀，究竟估值係咪平？晉佳覺得頂盡只係合理，市場悲觀起上嚟，下跌空間一啲都唔會細。
晉佳
本欄逢周三刊登
上一則: 一周三件：成渝夠平值博 - 錢雋
下一則: Follow Me：志高估值吸引可撈底 - 高彰坡
桌面版 使用說明 使用條款 聯絡我們
©2014 AD Internet Limited.
All rights reserved. 版權所有 不得轉載
智取大市 - 晉佳 舊文