銀行腳軟
2014/5/7 9:56:32
網誌分類: 經濟
杜指昨日跌130點，都是金融股惹的禍。金融股拖低大市，的美國國際集團AIG季度盈利倒退27%，營業額又差過預期，股價大跌4.1%。摩根大通跌1.6%，是跌幅第三大杜指成份股，同時拖累金融板塊連續第二日走弱，美銀下跌2.3%，美國運通及高盛都跌超過1%。
金融股、特別係銀行股唔掂，同監管措施愈來愈嚴，以及投資銀行部門收入減弱有關。 JP摩根上周五話，估計佢第二季交易收入將會跌20%。巴克萊話第一季交易收入跌41%! 因為客戶交易量低，市場環境惡化，在第二季亦不會改善。
「客戶交易量低」?都係一個幾嚴重的講法，到底係週期性還是結構性? 若以2008年海嘯過後交易量突然大升，過了兩年好年的住績計，投行部門收入下跌可說是週期回落。如今特別係債券交易無乜肉食。以有投資評級的企業債券為例，債級普遍好高(債息好低)，隻隻都高不易出現差價，就無套利交易。又缺大事件谷起個債市，所以生意淡靜。
唔好以為美國嘢同我地無關，美國銀行收益差，香港上市的大銀行收入都唔好(阿爺銀行另計)，好似匯控(005)
、渣打(2888)暫時都無運行。 美股昨日金融行業及科網股行業明顯走弱，美股昨日由頭跌到尾。杜指跌130點至16401點；標普500指數挫17點，收報1868點；納指大跌57點，造4081點，跌幅近1.4%。
市況唔好，投資者沽貨，科網及生化科技等有概念但無錢賺的行業，就成為首選，跌得更甘啦。社交網站Twitter限售股解禁，佢去年第四季，每股勁蝕3.12美元，唔少人想走，股價大跌18%，Twitter係昨日交投最大個股，股價更插至31.85美元，已較上市價潛水近三成！Twitter唔掂拖累科網股表現，Facebook賺緊錢，今年首季賺每股24美仙，都要跌4.4%，其他唔賺錢嘅公司，就跌得更加慘情啦！LinkedIn蝕11美仙，昨日跌5.7%！
消息傳來阿里巴巴入紙申請在美國上市，籌10億美元，唔知咁市道佢上唔上到市呢?
烏克蘭危機愈演愈烈，美俄大鬥法。分析估計能源係美國用以攻擊從俄羅斯經濟的主要武器。有「大宗商品之王」的知名分析師Dennis Gartman上日在《Fast Money》節目中的言論，頗值得留意，佢話能源類股今年雖走漲近7%，表現僅次於公用股與標普500指數。不過，除了煤炭類股，唔好指望能源類股仍能持續其漲勢。Gartman認為，「若見到美國很快賣出部分戰備儲備原油，唔應該感到驚訝。這是制裁俄羅斯的唯一武器。」所以原油價格將會有「麻煩」。即係話，油價有大跌的風險。另外，佢又指出好多人討厭煤炭，但不要忽略美國電力多數來自煤炭。所以煤炭價格無咁受烏克蘭危機影響，股價亦會硬淨啲。
陸羽仁
回應(1) 我想回應
陸羽仁 BLOG 舊文