魚樂無窮：平靚正的世盃概念股 - 唐牛
■永嘉集團作為adidas全球最大運動服供應商之一，受惠於今年世界盃，業績可看高一線。資料圖片
外滙基金派發成績表，季度投資收益連跌兩季，港股埋單更要輸錢，可見形勢凶險。由於官腔味濃，故一向對金管局總裁陳德霖所言不甚上心，但今次他指「今年投資市場屬相當困難的一年」，唐牛不能同意更多。不是嗎？美國正式啟動退市，環球資金流向大挪移，科網股率先出現走鬼潮，強勢股一隻接一隻倒下；阿爺嚴打投機活動，人民幣跌跌不休，令本已弱不禁風嘅A股雪上加霜；儲局何時加息又是未知之數，卻主宰著股樓命脈。
老老實實，大市喪吹無定向風，連雞仔注買股意慾都冇埋，實行少做少錯。不過，正如之前所講，資金大有泊向房託及公用股跡象，戰友可繼續留意。
永嘉三大賣點煞食
世界盃仲有一個月就開波，作為adidas全球最大運動服供應商之一嘅永嘉集團(3322)，挾著三大賣點，有望成為逆市奇葩。
賣點一︰業績靚仔。公司去年全年賺1.5億銀，按年微升0.7%，但如果拆開上下半年睇，下半年盈利較上半年大升逾六成，世界盃定單嘅威力盡顯，今年業績可看高一線。
賣點二︰派息特高。永嘉自2007年起年年派息，以去年全年每股派7仙計，現價息率達6.9厘，絕對具吸引力。
賣點三︰財務穩健。最新手頭淨現金7.2億銀，相當於市值近六成，每股NAV高達1.76元，現價1.02元，折讓逾四成。
係咁意做個七折價，可見1.23元，潛在升幅21%。
唐牛
上一則: Follow Me：志高估值吸引可撈底 - 高彰坡
下一則: 股場放大鏡：新華文軒炒回歸A股 - 歐陽風
魚樂無窮 - 唐牛 舊文