金融High Tea 2014年7月22日
中期炸彈
2014年07月22日
呢兩日書展好多名人現身，前金管局總裁任志剛都去為佢本新書搞簽名會，仲講咗好多嘢。同市民荷包直接有關的當然係對人民幣匯價作出預測，佢列舉咗好多理由，認為人民幣會繼續升值，其中一樣係中國雖作為全球第二大經濟體，增長速度也較鄰近其他地區為快，但國際資金現時持有中國資產的數量仍然相對較少，假若他是這些國際資金，也希望能投資一大部份到中國。
另外近期港匯較強，有分析指，這或是資金提早為滬港通作出部署。任志剛認為，現時開始為滬港通作出部署稍嫌過早，因距離十月細節出台仍有兩個月時間，但呢種分析並非完全無根據，因為中國資產實在吸引。
今個月港股一度炒上，主要係見到港匯偏強，金管局要入市沽美元，令到港元結餘超過二千億元。由於資金湧入，投資者揣測會否流入股市，於是偷步入市搶胡。不過，資金流入港元係上星期尾開始停止，港股氣氛又變得觀望。昨日有報道話，中港兩地已經就滬港通交易時間有共識，於是個別證券股又炒起，但暫時就唔見到起哄情況。
觀望氣氛轉濃
如果學任教授話齋，炒滬港通而家略嫌早，但無論如何又唔可以完全當匯港通無到。有股民問我佢手上完全無貨又點睇？ 我自己好少沽到一股都無，即使後市難測，揀啲有息派、業績穩定的股份，儲啲貨亦無大壞。但唔好忘記係八月人大宣佈政改框架，而家唔知佔中運動有能力搞到幾大同幾持久，萬一搞得大，恐怕有衝突，就算睇好都宜有兩手準備也。
喺無資金再流入消息下，港股軟軟哋，內地A股新一輪IPO登場，本周將有11隻新股申請認購，有分析認為會凍資近萬億，內地股市氣氛亦觀望。
由於港匯略見偏軟，加上港股即將踏入中期業績公佈期，投資者持觀望態度，而內地股市又無起色，令港股反覆偏軟，恒生指數高開30點後，不久即隨內地股市轉升為跌。午後最多跌82點見23372，最終失守十天線，並挨近全日低位收市。恒指收報23387點，跌67點；國企指數收報10355點，跌85點，成交金額進一步縮減至429億元。
港匯略見偏軟，加上港股即將踏入中期業績公佈期，投資者持觀望態度，而內地股市又無起色，令港股反覆偏軟，恒生指數高開30點後，不久即隨內地股市轉升為跌。午後最多跌82點見23372，最終失守十天線，並挨近全日低位收市。恒指收報23387，跌67點；國企指數收報10355，跌85點，成交金額進一步縮減至429億元。
瑞安建業(0983) 尾市跌勢轉急，股價收市急瀉1.27元或14%。主要從事物業發展及投資、資產管理、建築及承建、樓宇翻新及裝修、水泥製造及銷售以及投資控股。同系的瑞安房地產(0272) 則收1.95元，無升跌，瑞房年前高位3.8元，至今跌幅差不多有一半，以內房股而言，下跌幅度都唔算少，反而阿媽瑞安建業近年高價11元，係昨日大跌前，回落幅度唔算多。
瑞安補跌急插
內地項目佔瑞安建業資產比例唔算低，加上公司管理層透露水泥等生意都受產能過剩影響。該公司係12月結，可能好快公佈中期，唔知係咪呢個原因，股份單日就插咗落嚟。而家業績期到，有公司業績好，亦有公司業績差，投資者可能都要留意住，上半年大陸經濟麻麻，樓市亦唔係咁好，如果主要市場係大陸者，或者會受影響，當接近中期公佈，類似瑞安的業績炸彈會陸續有來。照睇佢而家股價唔算真係好抵，插完之後或者會彈一彈，但如果係投資，就唔建議咁急去撈貨啦，怕佢跌完反彈你又唔夠位食，跟住又再尋底。
陸羽仁
金融High Tea 舊文