金融High Tea 2014年8月19日
翻炒舊經濟
2014年08月19日
香港調低經濟預測，內地發表的數據都唔係咁靚仔，不過唔緊要，股市一樣可以照升。內地股市消化咗數據，A股下午炒上，帶動咗港股由跌轉升，最後升咗唔夠一點。
近排股市老馬有火，由舊經濟股去領軍。電訊股被視為受科網挑戰的行業，點知中移動(941) 借住炒4G概念，股價不斷爆上，昨日又升3.16%，收報96.35元，再創6年以來新高價，似乎真係有意挑戰紅底地位。
呢次看上中海油
中移動狂飆之餘，另一隻舊經濟股中海油(883) 連續兩日發力，全日升3.67%，收報15.24元。佢同中移動一樣，早半年仲被大行唱衰，話佢嘅油田有老化跡象，股價被大行狂質，直至過去一個星期先至狂炒，昨日仲急升咗。
內地能源業素有「三桶油」稱霸的說法，中石油(857) 、中海油、中石化(386) 各有地盤。中環茶友話，中海油因為傾側向上游開採業務，戰略性比其他兩桶油仲明顯，家內地好多海外油田併購，都係由佢進行，身份特殊自不待言，故此股價一直都特別硬淨。
不過，今年初中海油公佈業績，幾間大行唱佢業績遜於預期，認為反映咗油田資產老化，搞到佢嘅股價最低插到去11.42元，同高位16.48元差唔多無咗三分之一。
家買盤追捧中海油，股價經過一輪反彈後，與一年高位相差大幅收窄，現價市盈率9.41倍，股息收益率仲有3.74厘，睇落係咪有啲似中移動呢？茶友話，炒股有時唔使講理由。大戶家撩高指數，但唔想風險太高，就揀呢類估值便宜嘅舊經濟股去炒，之前睇淡原因已經拋到九霄雲外，散戶識得捉得正條路，咁咪有錢落袋囉。
講開能源股，中煤能源(1898) 煤炭銷售中心總經理吳軍表示，上半年煤價顯著下跌後，隨着國家推出微刺激政策、限產措施逐步見效等，煤價已見底，相信在下半年回升。
問及內地或即將啟動煤電聯動，他表示，今年首七個月內地電廠經營情況好過預期，煤炭價格下跌幅度已低過市場預期，照佢咁講，靠能源成本下跌帶動的電力股，受惠程度應該消化緊，炒開呢類股票嘅投資者要留意吓嘞。
內地公佈FDI數據差，港股再度掉頭向下，一度挫達189點，之後靠中移動及中海油力撐下，大市收復失地，最終微升收市。恒指全日收報24955點，微升0.5點；國企指數收報11065點，跌38點，成交金額697億元。
內銀績前有憂慮
恒指公佈會下調成份股比重上限，料匯控(005) 最受影響，股價跌0.4元，報83.5元。重農行(3618) 為首家內銀股放榜，公佈中期業績，市場擔心其資產質素惡化，股價收報3.76元，瀉6%；民行(1988) 挫2.3%，收報7.7元，是表現最差國指成份股；至於內銀四大行都全線向下。
港股能夠拗腰避過一跌，多少係內地數據雖然弱，市場仍觀望本周四公佈的匯豐PMI初值數據，內地股市延上周五升勢，今日持續靠穩，再創逾8個月收市新高。
上證指數收報2239點，上升12點；深成指報8045點，上升63點，多數板塊造好，文化傳播股、通訊設備股、科網股平均漲逾1%。
摩根資產管理表示，過去5年內地股市估值被下調，來自「滬港通」需求上升、宏觀經濟改善、整體改革寬度及深度超出預期，加上現時估值吸引，將推動A股估值上調。
陸羽仁
金融High Tea 舊文