陸羽仁 BLOG 2014年10月22日
歐洲大彈
2014/10/22 上午 09:38:28
網誌分類: 經濟
歐股大反彈，美股亦連彈第四日，美股可以講係三喜臨門，除了歐股大升，提振市場氣氛外，房地產數據靚仔，以及多家美企亦派出好過預期的業績報表，刺激大市。
睇股市恐懼指標VIX指數由一星期前嘅31.06高位，輾轉下滑至昨日收市嘅16.08，就反映出市場的氣氛同投資意欲。
美股杜指昨日大彈215點至16615點，漲幅1.3%；標普500指數漲37點，收報1941點，漲幅2%，納指再受蘋果公司股價大漲推動，大漲103點，收報4419點，漲幅2.4%。
歐元區9月通脹率降至0.3%，國基會(IMF)指有四成機會陷入2008年金融海嘯以來第三次經濟衰退。IMF上星期預計，歐元區2015年經濟增長1.3%，低於7月份預期的1.5%；預計今年只有0.8%。
歐元區領導人急急救亡，歐洲央行已啟動資産購買計劃，首先買入法國擔保債券，繼而買入意大利擔保債券。路透社昨日又報導，歐洲央行現時正在購入資産抵押債券和擔保債券，但這些市場的規模過小。歐央行正在考慮擴大買債規模，在二級市場購買企業債券，以對抗通貨緊縮、重振歐洲經濟的計劃。
受消息影響，歐元兌美元下跌近100基點，不過，有媒體報道「歐央行管委會尚無此決定。」歐元略為反彈，但仍然徘徊在1.26與1.27美元兌一歐元邊緣，最新報1.2711美元。歐央行行長德拉吉表示，歐央行正力爭將資産負債表規模擴大到2012年初水平，意味著全部計劃規模可能至少達7000億歐元。歐央行泵水救市，刺激歐股大幅反彈，其中德國股市升超過1.9%，法國仲勁，大漲2.3%。
美國房地産經紀商協會(NAR) 昨日公布美國9月二手房銷售銷量反彈較上月增長2.4%，至年化銷量517萬幢，創咗1年來新高，亦好過市場平均預期。NAR首席經濟學家表示，「低利率和房價的穩步上漲，推動9月二手房銷售實現健康增長。」不過，比較去年同期仍低1.7%，反映美國二手房市唔係好得。
美企業績繼續推動美股，蘋果公司上日收市公布業績，大屏幕iPhone産品需求強勁，且業績超出市場預期，盈利增長較上季增長13%。摩根士丹利將蘋果公司的股價目標從110美元上調為115美元。蘋果公司股價上日升2.1%，昨日再漲2.7%至102.47美元。
另外，多家杜指成分股公布業績，其中聯合技術公司第三財季每股利潤1.82美元，高過市場預期1美分，營收162億美元，較去增4.8%，亦較預期高；而旅行家集團(Travelers Companies)凈利潤及營收都好過市場預期。美企業績靚仔，推動大市反彈。
昨日提到股神巴菲特治下巴郡嘅IBM上日勁跌超過7%，累到股神一日唔見咗9億美元，衰開有條路，IBM昨日再插3.5%，巴郡再唔見多4.1億美元，而巴郡嘅另一隻重倉股可口可樂，昨日可口可樂發布第三財季業績，凈利潤每股48美分，符合市場預期；但營收119.8億美元，差過市場預期的121.2億美Ð 03;。可口可樂股價昨日跌0.6%，跌得唔算好多，股神持有4億股，昨日蝕咗1.04億美元。
不過，如果全年計，可口可樂今年第一季生意都係唔係幾得，今年股價跌咗2.48美元(5.6%)，股神一共唔見咗9.9億美元。如果加埋7000萬股嘅IBM，IBM全年跌咗24.64美元(15%)，以及TESCO嘅7.5億虧損，單計呢3隻股票，股神今年就蝕咗接近35億美元！你都咪話唔恐怖！
股神買股都唔係隻隻得，所以揀股唔易呀。
陸羽仁
回應(4) 我想回應
陸羽仁 BLOG 舊文