金融High Tea 2014年12月19日
驚見黑天鵝
2014年12月19日
市場昨日焦點有兩個，一個係聯儲局議息聲明，呢樣一早預咗；另一單就係成份股之一的比亞迪(1211) ，突然被人洗倉，一度急跌四成，就有小小「黑天鵝」味道。
耶倫鬆章繼續照炒
人人金睛火眼睇住的聯儲局聲明出籠，先前聯儲局放晒聲氣，會把過去聲明稱維持低利率「相當長一段時間」的說法刪除，暗示加快加息，揭盅會後聲明真係刪除呢句，但改為「基於目前的評估，委員會認為，對於將貨幣政策恢復正常化應仍具耐性。」雖然刪除了「相當長一段時間」，但用「仍具耐性」來表達加息時機，仍然令人覺得好耐不會加息。
聯儲局主席耶倫(Yellen)開記招時再補飛，話每次議息會議中雖然都有加息可能，但她睇唔到會於未來的幾個會議發生。
美股咁好自然帶升全球股市，港股又係保持近期人升多、佢升少的步伐，而且仲爆出比亞迪大跌的驚嚇場面。早兩日市場傳出內地政府推出雙源無軌電車，或會取代純電動巴士，會為比亞迪帶來直接衝擊，股價開始有「岌岌震」跡象，終於係昨日爆發洗倉狂潮，股價由開市的36.2元水平滑落，午後急插去18.7元，唔夠一日跌近一半，公司市值損失近200億元！之後股價先大力彈番上去，最後成交去到接近60億元，顯示沽貨力量好強勁，結果收市報25.05元，跌29%。呢隻突然出現的「黑天鵝」，都睇到好多被綁嘅小股民目定口呆。
股價急插後，公司強調目前經營一切正常，沒有任何突發事件。對有市場傳言指股神巴菲特減持股份，比亞迪回應指對有關傳聞並不知曉。
傳聞機構爆倉斬貨
聽聞有揸重比亞迪的機構爆咗倉，一沽就觸發沽貨潮。我成日都講，炒作新能源車呢類概念股，必定要睇住外圍同類公司表現，因為好多時呢類股票都係用外國龍頭公司作為估值標準。睇番美國曾經吹捧到好勁的同行電動車股王TESLA，股價由高位286美元，去到今個星期的205美元，都跌咗幾乎三成，唔好忘記美股同期係不斷上升創新高，同港股反覆偏軟好唔同。資金對呢類高市盈率的電動車概念股炒作興趣大降，喺咁嘅環境下，一有風吹草動，比亞迪就被人「閃插」，成為「黑天鵝」事件。
呢次黑天鵝事件，有中環茶友總結教訓，就係買以內地市場為主的股份，必要睇睇佢係民企定係國企，若然係民企，就不宜太瞓身，因為民企後台點都國企咁硬，好容易因為國策調整，變咗容易受傷的股份。
港股尾市在22800點爭持，恒生指數收報22832點，升246點；國企指數報11332點，升61點，成交元。油價持續低企，內地多隻航運股升停板，本港上市的航運股都幾標青，呢個唔多唔少都係炒落後概念。北京汽車(1958) 今日掛牌，暗盤收報8.14元，較招股價8.9元，低8.54%；每手500股，不計手續費，每手蝕380元。
陸羽仁
金融High Tea 舊文