異動空間：九秒九跑馬拉松
人人買咗股票，都希望佢即刻飛升，直至沽出一刻，但事實往往相反，股票開始升唔敢買，「睇多陣先，可能係虛火呢！」再升多10%，開始心大心細，「如果佢回5%我就買！」再爆多20%，你開始爆粗，「搞x錯！隻股票癲㗎，日日升！」到隻股票飆咗一兩倍，莊家開始放好消息，同大孖沙合作，又話搞高科技，擁有乜乜專利，「隻股好掂喎，有今生冇來世，發達就睇呢鋪！」終於不問價掃貨，而股票就在此時見頂。
情節熟口熟面呢？股票炒到尾段，一般是非理性的散戶在搶，印象最深的例子係阿信屋阿媽CEC國際（759），見頂嗰日幾乎係每五分鐘升一毫，用九秒九的速度跑馬拉松，最後梗係跪低，高位買家坐咗成年，賬面仍輸五成。魏力想強調，輸得最慘不是高追，而是不肯認錯止蝕。通常買咗股票，眼前只有該股的憧憬，好消息無限放大，壞消息就視而不見，這樣十分危險。
中證監本周又查兩融業務，上月已中伏的中信証券（6030），罰完應有短暫免疫期，今次再揩嘢機會不大，圖表出現「高低腳」見底形態，可小注試水溫，博上番廿八至三十元密集區。
魏力
http://www.facebook.com/2012jason
魏力
異動空間 - 魏力 舊文