魚樂無窮：五折大平賣潛在殼股
■合豐集團每股NAV高達2.07元；圖為集團主席許森國。 資料圖片
大市繼續整固，半新股及細價股炒個不亦樂乎。先講半新股，彈珠機Niraku（1245）平地一聲雷，單日喪升六成，完美演繹貨源歸邊藝術。按圖索驥，今日上市嘅現恆建築（1500）更加要留意︰上市價0.66元，發行股數8億，即市值只得5億幾，等同殼價。再講，近期上市嘅建築股全屬新股狀元，睇下震昇工程（2277）及日成控股（3708），上市時市值只得6億，而家？前者17億元，後者28億元！現恆建築可塑性大到不得了，難怪暗盤價已炒高四成。
再講細價股，炒風一發不可收拾，雅天妮（789）最多爆升三成，成交高達1.6億元，相當於市值三成有多，相當嚇人。今日再搵兩隻奀豬股，希望可以添食。
第一隻，合豐集團（2320），「你舊年11月推介時0.43元，而家0.96元喇喎，仲有得去？」唔夠半年升一倍，催化劑係連環賣廠套現4.8億元，由於成本超低，當中九成轉化成盈利，有錢賺又有現金揸手，青蛙變王子！每股NAV高達2.07元，現價五折大平賣，從賣盤角度出發，現時明顯大低水，短炒可候9毫樓下分段吸納。第二隻，勤達（1172），另一隻舊愛，賣點與雅天妮相似︰0.1元供股，過去五年滿江紅，說穿了又係殼股一隻，呢幾日唔聲唔聲到價，話唔定有動作跟尾，同樣值得關注！
唐牛
https://www.facebook.com/tongcow88
唐牛
魚樂無窮 - 唐牛 舊文