女神tea time：靚殼終現第一棍
TVB見呢期個市炒到澎澎聲，就展開抽水大法，又播《大時代》，又播《奪命金》，連即將冇命嘅亞視，都重播《世紀之戰》。劇無錯係好睇，但作為老散，喺大牛市見到秋官，多多少少都覺得唔吉利。話分兩頭，《大時代》都播咗廿幾年，今時今日大家討論股
市時，都仲係獨孤一味cap佢啲對白，到底係因為金融劇唔吸引，定係TVB嫌難拍廢事諗，大家心中有數啦。不過，丁蟹效應又真係幾靈，劇未播，個市就先腳震震。大家都聽過，休息係為走更長嘅路，於大牛市下小調整，對市場更健康。
殼股通常喺大市調整時特別標青，弘海（065）就係其中一隻有潛質喪炒靚殼。首先，佢作為一隻主板殼，市值只係3.4億元，而家創板殼都係呢個價，都未計升市應該水漲船高，所以佢實在平得過份。第二，喺公司上年9月第一次進行供股，5合1再1供1，只有42%股權參與供股，其餘由包銷商認購，貨源歸曬邊，易炒上。另外，公司講明由包裝轉型做媒炭，供完股拎住成1億cash，仲改名弘海高新資源，相信往後會有所動作。
呢兩日殼股明顯追跟落後，弘海都係噚日晏晝先出第一棍，市值又平，貨源又乾，仲可以博佢併購，已有齊好炒殼嘅元素。就算佢唔係真係有動作，佢轉名時點都可以炒一轉啦！所以博得過。
Fifi
本欄逢周二、四刊出
http://www.facebook.com/lovefrystock
Fifi
女神tea time - Fifi 舊文