中環在線：數碼通黎大鈞劈炮
電郵叫同事勿亂猜測
■黎大鈞係數碼通創始總裁，佢話係時候要交棒畀下一代領導層喎。 
數碼通（315）icon總裁黎大鈞突然劈炮唔撈！噚日數碼通收市後發出通告，話黎大鈞已經辭職，會留任到今年8月底先正式離開，不過就無話邊個會接替佢做數碼通總裁個位，事出之突然，震撼成個電訊界，亦拋出多個問號。
總裁一職暫時懸空
黎大鈞係數碼通創始總裁，做咗5年後離開過一段日子，2001年再返去一直做到𠵱家，據佢向內部員工發出電郵時就話，自己做咗總裁職位14年，係時候交棒畀下一代領導層，等佢哋帶領公司同整個行業邁進高速發展中以移動為先嘅互聯網市場。
作為數碼通嘅大股東新地（016）就話，新地會繼續支持數碼通，數碼通一直有完善嘅管理團隊，相信今次領導層交接將會暢順，咁到底交棒對象係邊個先？新地就話，會係數碼通嘅管理團隊，包括兩位執行董事陳壠龍同鄒金根，但據了解，佢哋諗住將總裁個位暫時懸空，唔知係想睇嚇邊個會跑出，定係會搵人空降呢？
自從新地管理層變動後，系內公司都冇乜變動，今次黎大鈞劈炮都算係第一次，不禁令人聯想到，佢嘅離開，係咪同管理層變動有關呢？新地發言人就話，大家諗多咗，而身兼兩間公司主席嘅郭炳聯亦表示，對黎大鈞為公司作出貢獻深表謝意。
黎大鈞亦喺通告表明，佢同董事會並無意見不合，喺內部電郵都叫同事唔好亂諗嘢喎，但咁樣會否反而太此地無銀呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文