金融High Tea 2015年4月16日
自由飛行
2015年04月16日
中國公佈內地經濟首季增長7%，勉強叫做達標，但已經係新低，消息公佈後大市一度回揚，但跟住又軟一軟。一如陸羽仁所言，阿爺一早堆定沙包，準備迎接呢個咁不利嘅經濟數據曝光，日前出口數字先嚟料，中港股市同日抽升，當無事發生，隔一日個市就回一回，昨日增長數字再公佈，市場又係無大反應，咁阿爺又捱過咗一個洪峰啦。
壞消息洪峰過去
股民如果心水清，會留意到四月初中央密集式公佈利好股市措施，咁做好大機會係為負面數據鋪定安全墊。呢個星期隨着數字逐一公佈，好消息出籠明顯減慢，照陸羽仁分析，阿爺好大機會唞唞，唔使再搞乜刺激動作，俾個市自由浮沉吓先。
內地今年首季經濟按年增長僅僅7%，是自2009年首季以來最低增速，低過去年同期及第四季的7.3%。不過，國家統計局新聞發言人盛來運就講得淡定，強調內地首季經濟增長增速雖放緩，但就業率、通脹率等主要指標仍在合理區間，而且經濟結構繼續優化，重申經濟總體在平穩區間運行。
中央做咁多拆彈工夫，梗係無理由話自己都腳軟，尤其股市定住咗，咁7%增長率係好定唔好，就有自說自話的空間啦！當然，外間對呢個數字就唔係咁滿意，好似匯豐大中華區首席經濟學家屈宏斌就覺得，首季增速和通脹率雙雙持續下行，表明總需求小於供給能力，出現產出負缺口。佢認為，眼下經濟下行壓力加大，減息和降低存款準備金率刻不容緩。
揸油股未係時候
屈宏斌嘅意見代表了部份外資分析，係比較正路的分析，不過，?家阿爺係玩緊綜合拳，利率政策要考慮股市同市場心理效果，確保呢幾「飛」子彈打出來要有實際效果。
無乜政策消息，指數變動不大，但炒落後仍然好好玩。三桶油借住國際油價彈番上54美元，幾隻油股就借勢上番今年高位，最叻隻中海油(883) 升咗4%。
近排好多網友問我好唔好入油股，一則佢哋等油價見底等咗好耐，二則油股氣股較落後，手上貨不足者想借油股加番大個倉位。我就覺得油價之前2月反彈到55.6美元，今次若然都升唔穿，隨時雙頂回落，?家個市炒落後炒吓油股，佢哋同煤股一樣，生意仲係弱勢。旺市揸都仲係揸強股，弱股要等生意轉勢，即係國際油價見底。低位買了油股可以趁彈高食胡，等佢插低再買番，游來游去玩短線。
雖然指數上上落落變動無前幾日咁勁，大市成交就續旺，連續第六個交易日成交過兩千億元。恒生指數昨收造27618點，升57點；國企指數收報14471點，升207點，成交金額2162億元。
炒落後大細齊落鑊
資金大玩炒落後，大件夾抵食的內銀股表現省鏡，是力撐大市功臣，單是建行(939) 、工行(1398) 及交行合力向恒指貢獻197點。建行漲逾4%；工行仲彈多啲，升4.9%，為表現最叻藍籌及國企指數成份股。佢哋上周升番到7年蟹位，我叫大家到水面唔好沽住，覺得內銀仲係平，結果真係仲有氣有力係咁上。
阿里健康終於落實注資，復牌後應聲炒上，收造12.26元，急升80%，升幅是港股最勁；同系阿里影業(1060) 升5%，已經係慢車。呢類概念股可以升到無譜，跌起上嚟同樣可以跌到無譜，「投資的我」當然唔敢落疊，「投機的我」人炒我炒，最緊要係識得有危險就跳車。陸羽仁同內地炒界傾開，佢話內地催谷「互聯網＋」，即係用互聯網增值，其中幾個概念吹得最勁，包括健康、娛樂、體育，成為投機押注的博彩區。
除了孖住大科網炒作的概念股，股仔喺靜市又乘時而舞。大昌微線(567) 中途停牌，暫未知原因；停牌前報0.83元，勁升71%。利海資源(195) 一樣係中途停牌，停牌前報0.6元，升70%。炒股仔熱度都幾誇張！
陸羽仁
金融High Tea 舊文