中環在線：榮智健堂伯 上商榮鴻慶
三代同堂現身
■榮氏難得三代同堂合照。 李潤芳攝
大家成日話中環寫字樓供應不足，明年終於多一幢寫字樓可以出租，就係上海商業銀行大廈，呢幢大廈噚日舉行平頂儀式，為隆重其事，母公司上海商業儲蓄銀行（上海商銀）董事長榮鴻慶罕有露面，佢年逾九旬依然老當益壯
，率領兒子，即本港嘅上商董事長榮智權與孫女榮嘉信，三代同堂現身。
■上海商業銀行大廈噚日舉行平頂儀式。 主持上商大廈平頂儀式
榮鴻慶一派上海紳士風度，雖然作風低調，但平易近人，家族亦大有來頭，已故紅色資本家榮毅仁係佢堂弟，中信泰富（267）前主席榮智健就係佢堂姪。
榮鴻慶父親榮宗敬，係清末民初有名嘅麵粉與紡紗大王，改革開放後，前國家領導人鄧小平，喺1986年中，親自接見榮氏家族海內外親屬200多人，肯定榮家對民族工業嘅貢獻。
噚日上商大廈嘅平頂儀式，喺中環總行4樓工地舉行，榮鴻慶篤住枴杖，喺太座攙扶下，行四層樓至平頂儀式會場，坐低都無氣喘，果然老當益壯。
榮老亦思路清晰，華華向佢請教，上海商銀舊年底喺台灣場外交易中心（OTC）掛牌買賣，即所謂二板上市後，會否考慮跟住喺台灣主板上市，然後來港作第二上市？榮鴻慶絕對冇話耳蒙蒙聽唔清楚，隨即笑笑口話：「一步步嚟啦」。
榮老雖然以香港為家，但近年除咗喺台灣出席上海商銀會議外，平日都深居簡出，所以呢次公開場合三代同堂大合照，相當難得。上商小量參股嘅內地城商行上海銀行，副行長李建國噚日亦有畀面出席平頂儀式。
上商歷史悠久 跨越兩岸三地
持有上商57.6%股權嘅上海商業儲蓄銀行（上海商銀），總部駐紮台灣，銀行歷史源遠流長，跨越兩岸三地，本身發展史就係一部中國近代史嘅縮影。
上海商銀由旅美學者陳光甫喺辛亥革命後，回國牽頭創立，其他參股人都屬浙江商界巨賈，包括榮家。中華人民共和國1949年成立後，上海商銀就移師台灣，為免本港分行遭牽連清算，於是喺1950年，將香港分行改名為上商，並於本地註冊，脫離原隸屬浦西外灘嘅上海商銀總行。到1954年，上海商銀喺台北設立總管理處，其後核准復業，成為上商嘅母公司
擬重建西環舊廈 未必添分行
唔講唔知，原來上商在港有多幢物業，重建中環上商銀行大廈之後，佢哋未來將會研究西環吉席街嘅發展方案，又會考慮重整旺角嘅物業組合。
上商喺吉席街持有3棟舊樓物業，行政總裁郭鍚志透露，呢3棟舊樓今年會開始清拆，但未定實重建細節。佢哋將來重建或翻新物業未必一定會順便加分行，事關𠵱家銀行都興數碼化，互聯網已經提供到好多服務。
至於樓高28層嘅中環上商大廈，將於明年下半年入夥，低層商舖、14樓至25樓寫字樓將會出租，郭鍚志預計每年有5,000萬元租金收入。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文