一周三件：威靈潛力無限
■威靈控股係超級現金牛，隨時有機會被湊大。 互聯網
威靈控股（382）有個超巨無霸對口企業美的集團，本身又坐擁19億元嘅淨現金，已經等於街貨市值，市值細奀之餘，現金牛係等新搞作。
威靈到去年尾，揸咗現金20.2億銀，只得8,773萬銀借款，淨現金19.3億銀，
係超級現金牛。又威靈對口係白色家電巨無霸美的集團（深000333），市值高達1,542億銀人仔，折約1,928億港元，係威靈市值56億元近34倍！
現金多遲早發圍
睇到亦諗到嘅係，威靈坐擁超級銀彈，若果齋擺定期收低息嘅話，唔合乎盈利極大化原則，呢筆銀彈，遲早有用。再講，威靈對口係超級大孖沙，威靈市值咁細奀，要湊大，一啲唔難。
當無事發生，威靈乜都唔搞作，睇番同系，近磅主打家電產銷嘅小天鵝（深000418），一年累升咗145%，上邊對口美的，同期亦翻咗一番，威靈一年高位喺2.67元，現價（2.00元）講緊係潛水25%！
又家陣祖國家電，除咗標榜環保節能外，亦都趨向智能化同「互聯網+」發展。啱啱喺呢個月頭，對口美的集團，就同電貿大哥大阿里巴巴，簽訂戰略協議，目標完成110億元人仔銷售額。
另據祖國研究機構預測，今年祖國智能家居產業規模1,380億銀人仔，到咗2020年，產業規模上到2萬億銀。亦都諗到，隨住兩大巨頭合作，加埋智能家電勁厚潛力，對落威靈主打電機等等產品，有步入第二春機會，明年度PE有機會由家陣得8倍，再跌到6、7倍水位。
兜威靈，基本面睇，只係當追貼番阿媽明年度10倍PE水位，威靈都講緊要升42%，到2.82元。又威靈翻一番到3.96元，街貨市值40億元唔夠，所以，若果真係俾湊大，爆炸力可以好驚人。
錢雋
細價股專家
本欄逢周二、三、五刊出
錢雋
一周三件 - 錢雋 舊文