陸羽仁 BLOG 2015年4月24日
放水的宿命
2015/04/24 09:13:04
網誌分類: 經濟
A股昨日上演戲劇性一幕，上證綜指突破4400點之後大玩拉鋸戰，午後抽高，但升至4444點?7年新高，就無力再上，「死」番落嚟，跳水70點，由升轉跌至，臨尾又後抽上4414點收市。
港股就跟一半唔跟一半，朝早
最多升過490點之後就跟住A股大插，但尾市上唔番去，恆指收市倒跌106點至27827點。
美股則先跌後升，尾市升幅收窄。三大指數升幅由0.1%至0.4%不等。杜指升20點，收報18059點；標普500指數的漲5點，收報2113點；納指升21點至5056點。美股近排見大陸股市咁高興，都唔執輸，好似矮仔上樓梯，唔覺唔覺又追番上歷史高位，杜指差1%就到歷史收市新高，標普500指數只差10點，而納指表現最勁，終於超越科網股爆破前高峰（2000年3月），創出15年以來新高，仲差15點就平咗歷史收市高位。
美國昨日出爐?經濟數據麻麻，3月新屋銷售量較上月大跌11.4%，且遠差過市場預期，最近一周首次申領失業救濟人數有所上升，而4月製造業PMI由上月的55.7跌至54.2，亦差過市場預期的55.5，加上歐洲股市因為德國4月製造業及服務業PMI差過預期而下創，其中德國及法國股市分別跌1.2%及0.6%，美股早段腳軟，全賴Caterpillar、AT&T等多家美企公佈的成績表，意外地好過預期，美股得以午後轉強。
值得留意?係昨日公佈中國4月?豐製造業PMI初值只有49.2，遠低過預期和前值的49.6，創咗12個月新低，顯示中國宏觀經濟數據黯淡，中信證券首席分析師鄧海清認為，阿爺今次之所以大力度降准，釋放流動性萬幾億到市場，係經濟下行幅度已經逼近政府底線，令到阿爺有啲騰雞，宏觀經濟政策基調從「保定力」移轉到「保增長」。阿爺要經濟增長，一般?做法都係泵水大搞基建，現時最大的基建項目，自然係「一帶一路」啦！
英國金融時報日前報導，中國將注入620億美元到國有「政策性銀行」，以支持其雄心勃勃的「新絲綢之路」（一帶一路）計畫，建設打通海外市場的基礎設施。所謂「政策性銀行」，係指內地三家主要為中國乃至海外的基礎設施和其他政策重點提供融資的國有非商業銀行，包括中國國家開發銀行(China Development Bank)、中國進出口銀行(Export-Import Bank of China) 及中國農業發展銀行(Agricultural Development Bank of China)。話口未完，中國進出口銀行上海市分行副行長李躍昨日透露，央行已批准以外匯儲備委託貸款債轉股形式向進出口銀行注資300億美元。以支援實體經濟發展及「走出去」戰略，消息指未來的進出口銀行，可能會在一帶一路中發揮更多作用。
澳大利亞聯邦銀行中國和亞洲經濟學家Li Wei亦表示，「經濟資料越糟，中國穩增長的措施就會越強。一季度增長可能很糟，不過在預期的政策支持下，二季度經濟可能會反彈。」
換言之，起碼在第二季經濟數據出爐（或者經濟有明顯改善）之前，阿爺只會放水，唔會收水，大市唔會死，呢段時間買股可以積極點，見到調整可以吸納，到咗7月初數據出來，就要小心啲啦！
陸羽仁
回應(4) 我想回應
陸羽仁 BLOG 舊文