中環在線：入股新灃食大茶飯
柯大俠2億私己錢買股
■柯清輝最近斥資2.2億元入股新灃做第二大股東。
港股大時代，位位都係股神，當茶餐廳阿叔都講炒股時，又點少得城中名人齊食大茶飯！好似醫管局前主席胡定旭早前成為先施錶行（444）聯席主席，候任機管局主席蘇澤光又入股21控股（1003）
，有「柯大俠」之稱嘅柯清輝最近都出手，斥資2.2億元入股新灃（1223）做第二大股東。
2億靠儲蓄得來
聯交所最新資料顯示，柯大俠上周三（20日）一擲2.2億元增持新灃3.7億股，成為第二大股東，持股量有17.6%，每股作價0.6元。
睇番之前嘅通告，台資裕元（551）正正就喺上周三配售約7億股新灃，作價同樣係0.6元。換言之，柯大俠係接咗部份裕元沽出嘅股份。
雖然柯大俠喺2009年退任恒生銀行（011）大班之後，先後加盟中策（235）與思捷（330）做主席，但係前者佢一股都冇持有，後者只持有小量股份。
今次係佢首次真金白銀大手買入一間上市公司嘅股份。
至於何來2億銀咁大筆銀彈呢？喺滙豐、恒生工作逾30年嘅柯大俠，噚日好謙咁話，自己「係打工仔，儲嚇儲嚇」喎！嘩，「儲嚇」都儲到2億元，睇嚟想買樓嘅年輕人要跟佢學嘢先得嘞。
柯大俠買得當然覺得係好嘢喇，佢噚日話「梗係覺得間公司好喇，冇負債、資產又好、業務有幾瓣，財務同前景都幾睇好」。
交遊廣闊嘅柯生話，與新灃大股東鄭盾尼、董事總經理施新新都認識，但強調增持「純粹個人決定，個人考慮！」佢仲話，持有新灃屬長線投資決定，咁會唔會再增持至成為第一大股東？柯大俠答得老實，話「呢啲係未來嘅嘢，𠵱家冇得預測」。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文