魚樂無窮：結好快上演倍升好戲
■港股上周五離奇挾升近400點，係丁蟹效應結束？ 資料圖片
港股上周五離奇挾升近400點，究竟係炒深港通傳聞，定係丁蟹效應結束？實在不得而知，但每當人人睇淡，就可以挾到你唔信，此乃股市最可愛（惡？）之處。難怪丁蟹都話︰「咁多人死，唔見你死！」
講番深港通
，消息一日未落實，都可以翻炒再翻炒，券商股作為受惠板塊，倉位點都要預埋佢。今日翻兜本地薑結好（064），目標升幅以倍計！
好誇張？大時代乜都有可能發生，今次用齊估值、概念、業績角度說服你。講估值，結好每股NAV0.57元，現價市賬率0.87倍，望一望其他行家︰耀才（1428）5.2倍，英皇證券（717）3.7倍，華富國際（952）6.5倍，結好較同業平均折讓83%，兩折大平賣也！
講概念，結好正考慮分拆證券業務獨立上市，有利估值再提升。路邊社消息指，結好一直乏人問津，緣於上市編號較敏感，內地同業不敢沾手，真相大白了！再講，同業金利豐（1031）宣佈分拆後，股價累升2.8倍，結好呢？不升反跌一成，十萬個不合理。講業績，分拆通告同時提到，去年盈利因特殊收益影響大跌，但持續經營業務溢利有增長，說穿了就係假盈警真盈喜。
一句到尾，結好集齊炒作元素於一身，劇本完美，仲買唔飛入場睇好戲？
唐牛
https://www.facebook.com/tongcow88
唐牛
魚樂無窮 - 唐牛 舊文