笑到最後：民族亢奮概念股
蘋果財經網上節目「青談三分鐘」昨日終於全部播映完畢，無論由質素、收視定係反應嚟睇，明顯係一個成功嘅節目。
不過成功唔可以咁簡單下定義，學中國足總話齋，要有層次。
話說「青談三分鐘」承蒙錯愛，嘉賓粒粒皆星，不過有時都會請錯暗星。有次請咗「某啲財演」（簡稱D財演
），遲大到，冇做功課，錄影時不斷重複其他主持問題再問一次，導演傑認為唔能夠縱容「明目張膽」嘅抄襲，高明尊重編輯自主，任佢剪，結果剪走曬嗰啲咁唔專業嘅抄襲行為。
出街第二日，D財演大怒，抱怨冇鏡出，威脅唔再幫手。高明再一次尊重民意。點知，過咗一星期，D財演又嚟pitch橋想上節目……
呢啲就係有層次，呢啲就叫成功。講開傳媒，今日本來想推介香港電視（1137），因跌到2.6蚊已跌夠，推介原因同2014年7月17日高明所寫「梁振英下台必定爆升股」一樣，本來可照抄，不過一來呢度係《蘋果日報》，抄文者連門口都入唔到，雖然去某啲報紙可以做到副社長，但始終兩者層次唔同，唔可以相提並論。話說回頭，D財演嘅抄襲行為，同某副社長抄襲歪論如出一轍，噢，原來靠抄就可以做副社長同埋研究部主管，此乃後話。
傳媒股遲早吃香
二來，因為亞視賣盤有憧憬，港視股價無厘頭升7.6%收報2.82蚊。高明唔信係王維基買，買咗都唔慌好嘢，但見報星期一公佈，無必要博，暫時不作推介，繼續觀望。
不過，香港傳媒股，遲早都會吃香，特別係有能力製作優質節目嗰啲。
點解？中國國力由盛轉弱，喺未正式進入首次嚴重經濟危機前，先前累積嘅龐大財富要另謀出路；而且，經濟增長雖然停滯不前，但係強國人自感大國崛起，國力無法從再靠高增長宣示，惟有用娛樂事業發洩民族亢奮。
有錢人多數投入娛樂事業，例如體育及媒體。大陸財閥已經買緊球會，高明認為唔單止係習總效應，就算冇領導鍾意足球，經濟發展必然會咁走；另外亦有科網富戶買傳媒影視股。當大陸節目製作要升級時，就要搵高質素傳媒合作，甚至併購。據講新主買亞視返嚟係做24小時財經台，體育、娛樂、傳媒，呢啲唔係好賺錢但有名、有影響力嘅資產，喺中國經濟放慢、陷入衰退前，只會越來越貴。
高明
即上偶像派財演高明專頁：https://www.facebook.com/bigricetea
本欄逢周一刊出
高明
笑到最後 - 高明 舊文