金融High Tea 2015年6月9日
守株待兔
2015年06月09日
上證指數破咗五千點後，升勢停不了，港股繼續受外圍加息等因素困擾跟唔到上去。不過，國企指數表現已經有好轉。內地家炒到烚烚聲，熱錢自然唔考慮南下住，本港股民唯有守株待兔，睇吓內地資金幾時會南下來香港炒低水。
內地股市向好，港股繼續做軟腳蟹，乏力原因好
多，包括美國9月份加息機會大增，外圍債息飆高，資金有可能要執位，加上歐債危機，亞洲區仲多咗一味新沙士，喺南韓有爆發跡象，再加上下周表決政改，負面消息接二連三湧嚟，就算內地個市點好，入市資金都係唔盡興。
不過，陸羽仁覺得內地股市升得咁高，股民遲早都會搵番平股買，港股質素不俗，市盈率唔貴，最重要好多H股同內地A股係一樣貨色，咁點解要買貴貨呢？到時資金就會流番入港股炒一轉，問題係呢個臨界點幾時會到呢？有人估7月，有人估再遲小小，總之，港股基本因素係抵買，就算家要等，有閒錢低位買點貨，夜晚都應該可以安睡。
內銀撐起A股
傳中行有望成為下一間混改國有銀行，多隻內銀股向好，支撐A股大市，上證指數上周破5000點大關後，今日再升穿5100點，收報5131點，飆108點，但創業板指數未有跟升，更連跌三個交易日，今日一度瀉逾5%，連帶深成指數全日亦跌逾1%收市。
恒生指數昨日低開113點，早段沽壓沉重，最多跌200點，低見27060點，但兩萬七千點見支持，50天線失而復得，加上中資金融股發力，令恒指止跌回升，最多倒升168點，高見27428點。不過內地中午三點收市後，尾市恒指腳軟，全日最終只升不足60點。恒生指數收造27316點，升56點；國企指數收報14113點，升199點，成交金額由上周五的1584.6億元，縮減至1511億元。
傳中行為下一間試點混改國有銀行，中行、交行及北京銀行A股升停板。內銀H股表現標青，中行(3988) 漲0.19元，造5.35元；農行(1288) 升0.06元，造4.25元；工行(1398) 漲0.07元，造6.69元；建行(939) 升0.1元，報7.89元；傳交行(3328) 計劃引入復星集團及騰訊(700) ，A股升停牌之餘，H股揚8%，造8.42元，升幅更是藍籌及國企成份股最勁。由於上證指數升穿5100關，帶挈內地保險股全線升，最勁係隻新華保險(1336) 升4%，造50.3元。
股仔就輪到遠東系大幅炒上，遠東國際(036) 爆升46%，造3.44元；遠東酒店(037) 飆34%，造1.03元；遠東發展(035) 揚3.5%，造3.84元，係最弱個隻。
外資對港股拒不入閘，唔肯大力入貨，但對個股仍有興趣，聽聞近日有啲基金都有去睇吓廠，好似隻理文造紙(2314) 就有動作。陸羽仁留意到摩根大通報告，玖龍紙業(2689) 過去三個月股價急升62%，比國企指數同期升18%較高，建議換馬至理文造紙。
摩通睇好理文造紙
摩通表示，包裝紙市場第三季淡靜，認為現時為沽玖紙獲利買理文造紙的良機，因其市盈率折讓高達30%。摩通仲將玖紙評級由「增持」降至「中性」，目標價由8.7元降至8元，折合預期2016財年13.5倍預期市盈率，同時續予理文造紙「增持」評級，目標價6.6元不變。
陸羽仁
金融High Tea 舊文