中環在線：馬雲老友「錢多多」
傳掃山頂豪宅
■聶歌信山項目坐擁山頂無敵景致。
■阿里巴巴舊年喺美國上市時，錢峰雷專程飛去美國支持馬雲。 資料圖片 阿里巴巴創辦人馬雲身邊多富貴朋友，出名嘅包括藝人趙薇與銀泰集團董事長沈國軍，神秘富豪亦唔
少，當中有一位外號「錢多多」嘅錢峰雷就曾經買入本港山頂豪宅，近日盛傳佢去咗會德豐（020）與南豐合作發展嘅豪宅新盤聶歌信山（Mount Nicholson）實地參觀，似係錢多想買貨喎。
曾擲7億買白加道豪宅
根據網上資料，39歲嘅錢峰雷係浙江寧波商人，擔任環球國際控股（香港）有限公司董事長，但發跡背景與公司業務性質神秘。有指佢熱心做善事，汶川地震、玉樹地震後迅速捐出巨款。
佢跟馬雲識於微時，中學時代已經認識。阿里巴巴舊年9月喺美國上市時，錢峰雷都有專程飛去美國支持。不過，馬雲鍾意四圍高調投資、入股香港上市公司，錢峰雷就偏向低調投資本港山頂豪宅。
會德豐與南豐合作發展嘅新盤聶歌信山，早排低調安排唔少富豪實地參觀，聞說當中包括錢峰雷。呢個山頂項目坐擁無敵景致，有分層與洋房，唔知錢峰雷鍾意邊款呢？
佢上月以2.65億元沽出渣甸山白建時道大屋，4年賬面賺6,700萬元，可能套咗現，錢多了，就想換件新貨都唔定。
佢舊年初，已經睇中和黃（013）山頂白加道28號超級豪宅，一擲近7億元，買入7號屋，呢間屋實用面積有成6,847平方呎，花園都超過1,800平方呎，每呎成10萬銀，豪氣迫人。
聶歌信山呢個百億地王，5年前淨係塊地都要104億元，每呎樓面地價3.2萬元，仲未計建築成本，想知賣幾錢一呎，就要等發展商稍後揭盅。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文