魚樂無窮：尋找iBond替代品
■炒股票，唔怕大升唔怕大跌，最怕悶局一場。 資料圖片
炒股票，唔怕大升唔怕大跌，最怕悶局一場。噚日上晝止跌回穩，下晝好似點穴咁，指數一大段時間得幾點上落，A股收市後叫有啲起色，但同之前大時代比，真係差天共地。全日成交一千億唔夠，創近一個月低，除非係超級
大炒友，或者經紀要幫客落盤，否則坐喺報價機面前，唔瞓著都幾難。新一批iBond鐵定下周二接受認購，條款同以往相若︰發行額100億、年期3年，坊間估計每年回報率3至4厘，都係嗰句︰就算中得兩三手都要抽，政府派錢喎，梗係攞啦。
iBond分得少，其他高息產品仲有乜好選擇呢？唔少人第一時間諗到人仔定存，不過，內地GDP水份甚高，經濟似強還弱，加上減息潮未完，滙價及息率都有下跌風險，制唔過！高息股呢？主要有兩大門派︰公用股及REITs。前者主打為兩電一煤，個人較鍾情煤氣（003），一來每年十送一紅股，八年後持股已倍增，二來近日出手回購，見底味濃。後者主打領匯（823）及置富（778），唐牛喺呢度講咗N次，你唔悶我都悶，所以介紹個新面孔畀大家︰春泉產託（1426）。公司主要持有北京華貿中心兩幢超甲級寫字樓，面積超過12萬平方米，另有約600個車位；現價息率7.7厘，市賬率0.55倍，惠理喺股災日掃貨，令其持股逾5%身份曝光，現價較其撈貨價僅高6%，諗得過！
唐牛
https://www.facebook.com/tongcow88
唐牛
魚樂無窮 - 唐牛 舊文