中環在線：「此路不通時 應重整旗鼓」
魔童「投降」股民唔buy
■王維基噚日喺專欄度，話要幫港視搵另一條路。 資料圖片
有「魔童」之稱的王維基旗下香港電視（1137）舊年底透過OTT形式喺互聯網啟播，最初《選戰》一劇有相當人氣，可惜氣勢無以為繼，截至本周二該台嘅每日平均點播用戶只得1
.3萬，較啟播時嘅20萬相去甚遠，王維基噚日喺專欄話「此路不通時，應該重整旗鼓，再走另一條路」似係宣佈投降。
過去大半年，港視都係股民嘅關注對象，舊年11月初啟播前，股價曾經急升，刺激公司高見4.77元，市值升至39億元，股民可能認為王維基呢個名都值呢個價，之後港視股價雖然回落，但每當王維基喺專欄講嚇公司前景，或者市場猜想港視有機會攞到亞視個牌，港視都有得炒番轉。
點播用戶跌剩1.3萬
不過，股民與王維基可能終於面對現實，王維基噚日喺專欄宣傳新劇《三面形醫》製作認真，順便提到「人生不如意事十常八九，此路不通時，應該重整旗鼓，再走另一條路」。
王維基出名計仔多，佢講得話有另一條路，換轉喺以前，股民一定以為佢有計令港視起死回生，可惜噚日港視完全冇反應，全日得83萬元成交，少得可憐，噚日港視市值亦只得17億元，較舊年底高位唔見56%。
事實上，王維基咁樣講亦似係宣佈投降多啲，唔通港視真係就咁玩完？王維基嘅個性又唔似係會認輸㗎喎。不過，港視最新公佈每日平均點播用戶只得1.3萬，確係慘不忍睹，大家惟有留意王維基點樣走另一條路喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文