魚樂無窮：幪面靚股頻頻玩回購
■巫啟賢估唔中誰是幪面歌王，但聰明的讀者一定知道，頻頻回購的旭日係幪面靚股。 資料圖片
好嘢收埋自己食，可謂人之常情，上市公司瘋狂回購，只有兩個原因︰1.現價超值；2.有好消息跟尾。是旦中一樣，股價都會三級跳，中曬兩樣？爆炸力難以想像。
「邊間公司咁筍？
難估過幪面歌王喎！」呢隻低調幪面靚股，幾乎日日出回購通告，旭日企業（393）是也！翻查紀錄，旭日今年共回購48次，扣除假期及blackout period，有一半時間都係買緊自己股票，究竟所謂何事？睇睇旭日背景，主打日常便服零售、出口及製造，旗下品牌包括Quiksilver、Roxy、Jeanwest等，去年持續經營業務溢利1.2億，飆1.6倍，零售分類業績升36%，成為增長動力，整體毛利率亦升近1個百分點至42.2%。公司十幾年無間斷派息，近年派息比率超過九成，現價息率6.5厘。手頭淨現金達8.3億，同市值16.4億比較，含金量超過一半，每股NAV2.03元，現價折讓逾兩成。以上種種，完全符合超值原則。
「係就係超值喇，橫睇豎睇唔似有好消息跟尾喎！」大股東最新持股56%，股票回購註銷後，持股變相增加，股權更加集中，市值扣除現金僅8億，乾乾淨淨，可以做啲乜？自己加少少想像力吧！今年回購價介乎1.47至1.68元，中間價約1.58元，咁啱同噚日收市價一樣，六個字作結︰低風險高回報！
唐牛
https://www.facebook.com/tongcow88
唐牛
魚樂無窮 - 唐牛 舊文