一周三件：瑞年博翻一番
■王福才任主席的瑞年國際，目標博翻一番。 資料圖片
瑞年（2010）總值2億元嘅CB，上周啱啱獲CB持有人Newport Consulting，以每股3蚊溢價兌換瑞年正股。後邊Newport終極對口，就係中信，瑞年如虎添翼！呢次Newport CB兌換價比瑞年
現價（2.04元），有46%溢價，對瑞年信心爆棚。又瑞年最高位2010年7.96元，現價跌咗74%，亦比起Newport CB換股價，高出62%。而單係食住主打氨基酸保健品，瑞年上年盈利上到5.74億元人仔，創咗2010年以嚟新高。集團股價無可能長期同靚仔業績背馳，Newport溢價換股，除笨有精。
估值平+炒分拆
瑞年往績PE得3.4倍，唔好計多，今、明兩年盈利keep住上年16%增長，就算計曬啱公佈計劃先舊後新，同4月配股攤薄，EPS0.52同0.6元，兩年預測PE亦係得3.9同3.4倍，平絕全場。瑞年上年尾NAV4.7元，同樣連埋攤薄計，NAV落到2.97元，瑞年PB，仍然只得0.7倍，又係平到笑。
瑞年呢期進軍潛力勁厚零售醫藥瓣數，而喺發CB畀Newport前，瑞年亦同Newport對上控股中信國通，訂立戰略合作協議。即係話，中信國通唔單只係靜態投資者，呢位中信牌頭大孖沙，若果喺實務上作出支持，瑞年仲掂檔。
瑞年前排話有意分拆保健飲品上市。上年呢瓣嘅分部溢利，高達2.3億元人仔。場內隨手整件近磅瓣數，主打太太口服液嘅健康元（滬600380），講緊58倍PE、5倍PB。瑞年分拆，若順風順水，潛在增值亦超級肥仔。
唔扯咁遠，齋睇呢轉硬數據，吸引到漏口水。瑞年翻一番到4蚊，明年預測PE，先得6.8倍，向上實情仲有大把空間。故Newport畀溢價入股冇乜所謂，大孖沙之後，係博啖啖肉。
錢雋
細價股專家
本欄逢周一、三、五刊出
錢雋
一周三件 - 錢雋 舊文