笑到最後：我估冇反彈！
上個星期一，本欄話港股進入「大型悶熊」，四隻字之中，中咗「大型」同「熊」，個「悶」字錯咗，因為由星期一開市至星期五收市，連跌五日，恒指直插1,563點，一啲都唔悶。大家可能會問，你覺得個市係熊，咁你有冇沽空先？有，不過只係中間片咗兩刀，唔算賺乜大錢，因為睇法係
悶熊，冇諗過咁快開始，落盤時且戰且退，絕對食唔盡跌浪，呢段時間仲有微利賺算係咁。
本欄唔會對重演股災後大反彈抱有大期望，因為當時係孖展斬倉式跌，大家以為震走咗弱者，牛市未完；今次用咗個幾月去跌返穿股災日低位，任何反彈，都係大戶掟貨良機。
兩道力量沽港股
將一千點攤平一個禮拜跌，係大戶手法，沽貨分幾日清以免質殘股價，港股單日成交亦都唔夠大戶清倉所需。大戶沽得，背後一定係基本因素主導。高明相信，而家主要有兩道力沽港股。
第一、市場正下調緊中資股估值。現時恒指PE係9.3倍，呢一刻可能仲係「平」，但美股跌緊，香港呢啲二奶市場要相對derate，中資股係新興市場，更加要再折讓；同時，中式QE半年即刻玩完，即係之前地方債、房地產泡沫、經濟轉型失敗呢啲問題已無對策，加上暴力救市消耗過萬億元失敗而回，將企業盈利用嚟買股票等同放棄未來。股市估值睇將來，中資股放棄投資，將來盈利要打折扣，所以股價下降去就番個「合理值」。
呢方面，首先唔好下下用華文去賴「外資」，因為按照「國情」，最先得知中國唔掂然後棄艇，一定係中國人。唔信？可以是旦搵個全家都揸外國護照嘅香港高官問嚇。如果你當呢啲揸外國護照嘅華裔人係「外資」，則作別論。
第二、美國加息。現時跌法有啲似2013年美國準備退市，令新興市場任何資產喪跌。假設係外資大戶美港兩邊做嘢，過去幾年美股升幅，山大斬埋有柴，美港股市一齊撤資，港股當打個平手走，整體都一定贏住走，加埋樓上第一點，再冇憧憬揸港股，每日基金不問價沽貨，對佢哋嚟講冇乜損失。
如果華文作者最憎嘅外資大戶終於離場，即使佢哋沽清見底，港股都要面對見底不等於反彈呢個殘酷現實，因為再冇多餘資金掃貨，唔通呢個時候你仲旨意大陸佬？
高明
https://www.facebook.com/bigricetea
本欄逢周一刊出
高明
笑到最後 - 高明 舊文