一周三件：
橙天嘉禾夠殘
■伍克波任主席的橙天嘉禾，上月初連續增持，權益增至67.15%，街貨得32.85%。 資料圖片
橙天嘉禾（1132）已經發半年預警，加埋個市大插，集團若果再質穿7月8日低位，股價同2008年海嘯價差無幾，到時值得睇實。
質穿0.35元兜轉
橙天嘉禾嚟緊28日
派半年成績單，估計盈利倒退74%。但當呢次倒退，主要係無咗上年同期，一筆電影院交收延遲所獲補償收益。齋計經營溢利，有近9%增長，實際幾靚仔。又今年上半年，橙天嘉禾旗下深圳嘉禾影城票房收入，係喺全國前三甲位置。祖國上半年票房203億元人仔，同比翻半番，7月全國票房55億元人仔更刷新單月紀錄。祖國文化產業火紅又講競爭力，橙天嘉禾亦一啲唔輸蝕，照計全年實際經營溢利，應該比上年靚仔。
橙天嘉禾老闆伍克波，啱啱上個月6至8日，港股大插期間，落場增持3,323萬股。當中喺7號買入最大板，共1,841萬股，每股成本價0.496元，橙天嘉禾現價（0.46元）潛緊水。
連埋呢期增持，伍生喺集團權益，上到67.15%，街貨得32.85%，等值4億元咁大把，往績PB得0.7倍。又就算成間公司計，橙天嘉禾市值都係12.5億元，場內阿里影業（1060），PB講緊5倍，市值高達470億元，係橙天嘉禾總市值38倍！又祖國萬達院線（深002739）仲勁，家陣過千億元市值，28倍PB，香江呢邊星美（198）都講緊2倍PB、漢傳媒（491）1.4倍。橙天嘉禾品牌唔削，但PB平咗大大截。個市立立亂，若橙天嘉禾再跌，質穿0.35元兜轉，博上番上邊伍生增持成本0.49元，講緊要升45%，PB先得0.75倍，未有耐追到行家。
錢雋
細價股專家
本欄逢周一、三、五刊出
錢雋
一周三件 - 錢雋 舊文