中環在線：百利保董事好打得
58歲範統谷胸上擂台
■範統（右）喺練習泰拳時都好認真，見佢踢咗5分鐘已經流曬大汗。 黃耀興攝 
百利保（617）執行董事範統唔算高大威猛，兩年前一篇雜誌訪問，大家才知道佢原來好打得，既跟冼國林師傅練
散打，又跟香港拳王杜恆霖學泰拳。58歲嘅佢本周六將會再上擂台，對手只得30幾歲，佢嘅目標係「唔好輸」！
噚日走去睇範統練習泰拳，問佢當身邊朋友知佢咁打得，會唔會唔敢得罪佢，佢即刻借機會澄清，指自己冇大家想像中咁好打。話雖如此，見佢跟泰籍教練練習時，踢腿「逢逢」聲，踢咗5分鐘已經大汗淋漓，毫不留力，如果俾佢踢中一腳，應該都幾攞命。
對手係30幾歲基金經理
範統平時現身講賣樓，通常西裝骨骨，呢日換上緊身衫練拳，40吋胸肌果然唔講得笑，相當結實。
佢話最怕有肚腩，為減肥與減壓，5年前才開始跟冼國林習詠春、練散打，之後認識到杜恆霖，開始愛上泰拳。佢平日工作繁忙，只能在周六、周日練拳，每次練兩小時，另加跑步練氣。
佢指，打拳主要講「一膽，二力，三功夫」，「膽即係有冇心去打，最緊要係落場唔好（畏）縮」，氣力又比技術重要，「有技術但唔夠氣，都係做唔到出嚟」。
雖然佢年紀唔細，但勝在有心有膽，平時亦有跑步，夠氣夠力，所以早幾個月前，當杜恆霖邀請佢參加本周六嘅慈善擂台賽，佢一口應承，「呢類拳館自己搞嘅比賽比較輕鬆，我估自己都捱到全部3個回合（每回合兩分鐘）」。
今次比賽共有20人參加，當中有基金經理、銀行賓架、會計師，最後生廿幾歲，範統肯定係年紀最大嗰位，佢嘅對手係30幾歲嘅基金經理，比佢細一半，力氣與速度應該佔優，不過範統冇有怕，目標係「唔好輸」，睇佢腳腳有力，都唔係冇可能。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文